سپکو افغانستان ته د ملګروملتونو له لوري د بشري مرستو پر څرنګوالي اندیښنه ښودلې

د افغانستان پر بیارغونې د امریکامتحده ایالتو د حکومت سرمفتش جان سوپکو افغانستان ته د نغدو پیسو پر راتګ اندیښنه څرګنده کړې.

جان سوپکو په یوه مرکه کې ویلي،ملګري ملتونه چې کومې نغدي مرستې افغانستان ته استوي، د هغوی د لګښت څرنګوالی ورته څرګند نه دی او همدا یې د تشویش لامل دی.

سپکو زیاته کړې:«موږ له دې امله ډېر اندیښمن یو، زموږ یوه دنده همدا ده،چې پر هغو پیسو څار وکړو،چې د امریکا مالیه ورکوونکو له جېبه د بشري مرستو په موخه افغانستان ته استول کېږي.» 

سوپکو   ویلي، دا ورته یوه جدي موضوع ده او په دې تړاو یې د ملګرو ملتونو له چارواکو سره هم خبرې کړي،ځکه اوس مهال سیګار په مستقیم ډول په افغانستان کې نه شته دی. 

هغه زیاتوي:«موږ د ملګروملتونو له چارواکو سره په دې تړاو خبرې کړې دي. د دې پیسو ساتنه څنګه کوي. موږ هېله لرو،چې دا پیسې به خوندي وي،خو ستونزمنه ده،چې دا ډاډ ترلاسه کړو،ځکه سیګار په افغانستان کې شتون نه لري.» 

د اقتصادي چارو یو شمېر  شنوونکي بیا تر ډېره د سیګار اندیښنه د نورو لپاره د  اندیښنه زیږوونکې بولي او وايي،له افغانستان سره به پر راتلونکو مرستو منفي اغیز وکړي.

د ا فغانستان اسلامي امارت بیا د سیګار د سرمفتش دغو اندیښنو او څرګندونو ته ځواب نه دی ویلی،خو دا موضوع هم تر اوسه پورې په څرګند ډول واضیح شوې نه ده،چې دغه نغدي کڅوړې چیرته لګول شوي دي.