له هند او تاجکستان وروسته د افغانستان لپاره د امریکا متحده ایالتو ځانګړي استازي توماس ویسټ په ترکیه کې له هغو پخوانیو افغان سیاسیونو سره لیدلي،چې تازه یې دمقاومت په نوم شورا جوړه کړې ده.
ویسټ د ترکیې په استانبول ښار کې د پخوانیو سیاسي ګوندونو مشرانو او د ښځو او مدني ټولنو له استازو سره لیدلي دي .
په دغه لیدنه کې د افغانستان په تړاو بحثونه شوي او له اسلامي امارت سره پر مذاکراتو سیاسي توافق او د خلکو د حقونو پرساتنې ټینګار شوی دی.
د سیاسي چارو یوشمېر تحلیل کوونکي په دې بارو دي، چې د امریکا متحده ایالت د افغانستان په تړاو بله لار غوره کړې اوهلې ځلې یې پیل کړي،چې یو بل سیاسي توافق له لارې خپل هغه پرګرامونه چې د ښځو او نورو برخو کې یې لري پلي کړي.
دوی وايي، له اسلامي امارته غواړي، چې واک دې له انحصار وباسي او پر لوړو کلیدي څوکیو دې مسلکي کسان وګوماري.
د سیاسي چارو تحلیل کوونکی سرور نیازی وايي:« د توماس وېسټ سفر دهلي ته هلته له داکټر عبدالله سره لیدل، بیا تاجکستان ته د هغه سفر او بیا په ترکیه کې د مقاومت شورا له ځینو غړو سره لیده کاته کوي، دا په دې مانا ده،چې امریکا یو بل حرکت پیل کړی دی. هیله لرو چې پایله ورکړي او له طالبانو مو هم هېله داده،چې پر هېواد مین ا ومسلکي کسان دې پر دندو وګوماري او قدرت دې له انحصاره وباسي.»
ځینې بیا وايي،د امریکا متحده ایالتو دغه تازه هلې ځلې کولای شي،چې ملي سیاسي اجماع رامنځ ته کړي او د یوه داسې دولت پرجوړولو منتج شي،چې ټول افغانان په کې ځان وګوري او د جګړې مخه ډب کړي،خو په هغه صورت کې به بریالۍ وي،چې اسلامي امارت هم له ځان سره همغږی کړي.
د پوهنتون استاد فیض ځلاند وايي:« توماس وېسټ په دې وروستیو کې ګڼو هېوادونو کې له افغانانو سره مجلسونه لرلي دي،تاجکستان ته یې سفر درلود،هند کې یې له ډاکټر عبدالله سره وکتل او اوس په ترکیه کې یې هغو کسانو سره لیدلي،چې هلې ځلې یې پیل کړي،چې له طالبانو پرته د افغانانو یوه سیاسي جبهه جوړه کړي. دغه ټولې هلې ځلې کولای شي،چې سیاسي حل لارې ملي سیاسي اجماع رامنځ ته کولو او په لویه کې د داسې یوه دولت رامنځ ته کولو چې په هغه کې ټول افغانان ځان وګوري او موږ وکولای شو،چې د جګړې مخه ډب کړو دا هلې ځلې په هغه صورت کې ډېرې زیاتې بریالۍ کیدا شي،چې طالبان هم ورسره همغږي شي.»
د سیاسي چارو تحلیل کوونکی طارق فرهادي بیا وايي، نړۍ او ګاونډیان د افغانستان د اوسني حکومت له ترکیب راضي نه دي او همدا لامل دی،چې ډیپلوماتان یې اوس د اسلامي امارت سیاسي مخالفینو سره خبرې کوي،چې دا لیدنې د دې ښکارندوی کوي،چې نړۍ یې رسمیت پیژندنې ته حاضره نه ده.
هغه زیاته کړه:« نړۍ د افغانستان خلک او ګاونډیان د افغانستان د اوسني حکومت ترکیب رضایت بښوونکی نه ګڼي. همدا دلیل دی،چې بهرني ډیپلوماتان نور افغانان له نږدې ګوري او خبرې ورسره کوي. د دې مانا داده،چې د طالبانو اوسنی حکومت که په دې شکل وي،هیڅ څوک حاضر نه دي چې پر رسمیت یې وپېژني.»
اخوا د سیاسي چارو تحلیل کوونک بلال فاطمي بیا وايي، که د امریکا متحده ایالت په دې فکر،چې د اسلامي امارت د مخالفینو له لارې به افغانستان کې خپلو موخو ته ورسیږي غلطه لار ده او هغوی چې افغانستان کې اوس ځای نه لري،له هېواده بهر اوسیږي.
فاطمي وايي، وړاندیز یې دادی،چې د امریکا متحده ایالت باید اسلامي امارت پر رسمیت وپیژني او هغه پرګرامونه چې واشنګټن یې غواړي،دښځو حقونو او نورو برخو کې یې پلي کړي،د اسلامي امارت له لارې دې پرمخ یوسي،چې ورسره به افغانستان له اوسني وضیعت هم راووځي .
هغه زیاته کړه:« غوره داده،چې د امریکامتحده ایالت د تفاهم له لارې کار واخلي او اسلامي امارت دې پر رسمیت وپیژني،ترڅو وشي کولای،چې هغه پرګرامونه چې دوی یې د افغانستان لپاره مهم ګڼي د اسلامي امارت له لارې پلي کړي،ترڅو مسایل حل شي او افغانستان له دغه حالته ووځي.»
د افغانستان لپاره د امریکا متحده ایالتو ځانګړي استازي توماس وېسټ هغه هیوادونو ته سفرونه پیل کړي چې واک ته دامارت له رسیدو سره ګڼ شمیر پخواني افغان چارواکي او دپخوانیو سیاسي ګوندونو مشران ور کډه شوي دي. توماس ویسټ په هند کې له ډاکټر عبدالله او تاجکستان کې دیوشمیرنور پخوانیو افغان سیاسیونو سره له لیدنې وروسته ترکیې ته تللی او هلته یې هم دافغان ښځو دټولنې ترڅنګ دپخوانیو سیاسي ګوندو له مشرانو سره لیدلي دي .
