Skip to content
د افغانستان اسلامي امارت له شپږ ټولګي پورته د نجونو ښوونځیو د پیل لپاره د لارې هوارولو په موخه د سترې محکمې د مشر پر مشرۍ اته کسیزه کمېټه جوړه کړې،چې د ښوونځيو د پیل پر وړاندې پراته خنډونه وارزوي او بیا پرانېستلو ته یې لار هواره کړي
خو د سیاسي چارو یو شمېر شنونکي بیا وايي، د ښوونځیو پیل په موخه د کمېټو جوړول یواز بهانې دي او د ښوونیز بهیر له ځنډولو د سیاسي موخې په توګه کار اخېستل کېږي.
د پوهنتون استاد جاوید مومند وايي:« زه فکر کوم،چې دا یو څه بهانې دي، د دې لپاره چې دا د ښوونځيو مسله نوره هم وځنډېږي،ځکه اوس ژمی هم راروان دی،په ځینو ولایتونو کې هوا سړېږي، په هغه صورت کې هغه امکانات چې باید موږ یې ولرو، نه یې لرو. د دې لپاره دا یو څه بهانې دي او افغانانو ته دغه بهانې د منلو وړ نه دي. دا هم ملي مشروعیت ته زیان رسوي او هم نړیوال مشروعیت ته زیان رسوي.»
دغه کمېټه کې چې د کابینې برحاله چارواکي او دیني عالمان پهکې شامل دي، تراوسه پورې یې په تړاو پوره جزئیات نه دي شریک شوي
په بلخ، شبرغان ولایتونو او ځینو سیمو کې د نجونو پر مخ تر دولسم ټولګي ښوونځي خلاص دي. د پوهنې وزارت د دغه خبر په تاییدولو سره وايي، په یادو سیمو کې ځایي خلکو په خپله خوښه ښوونځي پرانېستلې دي او په خبره یې د اسلامي امارت له خوا یې مخنیوی نه کېږي.
د سیاسي چارو شنونکی ډاکټر کمال سادات وايي:« تر هغې چې په کابل،ولایتونو، ولسوالۍ او کلیو او باڼدو کې ټول ښوونځي نه وي پرانېستل شوي او نجونې عملا ښوونځيو ته نه وي تللي، د داسې کمېسیونونو او کمېټو جوړول د وخت ضایع ده. ځکه دا موضوع د پوهنې وزارت پورې تړاو لري او باید ژر یې د خلاصون اعلان وکړي. بله خبره دا چې، په ټول افغانستان کې د ښوونځیو په نصاب، د نجونو پر جامو او د نجونو پر راشه درشه کې هېڅ غیر اسلامي نښې نښانې نه لېدل کېږي.»
د نجونو ښوونځي چې له تیرو اوویا ورځو راپدیخوا د نامالومو دلایلو له مخې تړل شوي،له امله یې شااوخوا دوه میلیونه نجونې بې برخلیکه پاتې دي.
تېرو دوه میاشتو کې د اسلامي امارت د ځینو لوړپوړو چارواکو له اړخه د نجونو د ښوونځیو د پرانستلو په تړاو ژمنې وشوې،خو دا چې یادې ژمنې به کله پوره او د نجونو پر مخ به ښوونځي کله پراېستل شي، لا روښانه نه ده.
