د کندهار ولایت یو شمېر سوداګر وايي، واک ته د اسلاميامارت له رسیدو سره سوداګري کمه شوې او په دې برخه کې د شته ستونزو په حل کې تر اوسه پورې پرمختګ نه دی راغلی.
سوداګر قاري ګل محمد وايي:« د اسلامي امارت له راتګ وروسته له نړۍ سره سفارتي اړېکې پرې شوې. زموږ هغه سوداګر،چې وچه مېوه هند ته وړي او راوړي، ستونزو سره مخ دي. ستونزې بیخي ډېرې دي. په دې شااوخوا اوه یا اته میاشتو کې تر اوسه پورې تګ راتګ نه دی شوی. په دغه موده کې نه له دې خوا نه هم نورو هېوادونو سوداګر راغلي دي. »
سوداګر سیف الرحمن وايي:« بانکي سیسټم کې ستونزو له موږ سختو ستونزو سره مخ کړي یو. زموږ پیسې په بانکونو کې بندې دي. موږ ته بانکونه پیسې نه راکوي. موږ ټول سوداګر له دې ستونزو سره مخ یو. هغه پیسې چې زموږ بهر هېوادونو کې بندې دي، ترلاسه کول یې ستونزمن کار دی.»
پر بانکي سیسټم لګیدلي محدودیتونه،مالیاتي ستونزې او سوداګرو ته پر وخت د ویزو نه ورکول د سوداګرۍ په برخه کې هغه ستونزي دي،چې ګڼ افغان سوداګر ورسره لاس او ګریوان دي.
بل لوري د افغانستان د سوداګرۍ او پانګوني خونه وايي،دوی له حکومت سره کار کوي،چې په دې برخه کې اسانتیاوي رامنځ ته کړي.
د یادې خونې مشر محمد یونس مومند وايي، د حکومت یو شمېر پخواني کارکوونکي غواړي،په مالیاتي برخو کې ستونزې ډېرې کړي.
هغه زیاته کړه:«تاسې په دې پوهېږئ، بانکي سیسټم، تر اوسه پورې عادی شوی نه دی. د دې لپاره هڅې روانې دي،چې بانکي سیسټمونه عادي شي، په مالیاتي ادارو کې ستونزو له منځه ولاړې شي.پخواني کارکوونکي هم اوس غواړي،چې په مالیاتي ادارو کې ستونزې جوړې کړي. تاسو اوس سوداګر ولېدل،چې ټولو په مالیاتي ادارو کې ستونزې لرلې. نو هڅه دا ده،چې په مالیاتي ادارو کې ستونزې له منځه ولاړې شي او شفاف مالیاتي سیسټم باید جوړ شي.»
پر افغانستان د اسلامي امارت له واکمن کېدو راهیسې لس میاشتې تیریږي،خو لاهم په ګڼو برخو کې تر اوسه پورې ستونزې نه دي حل شوي.
سوداګر او پانګوال په بانکي سیستم د محدودیتونو کمول او په ګمرکونو کې د اسانتیاوو غوښتنه لري.
