د افغانستان مخکېني حکومت د ملي امنیت شورا سلاکار،چې د نظامو له پرځېدو وروسته په بریټانیا کې اوسېږي، له بي.بي.سي یې په خپله تازه مرکه کې ویلي، په وروستي ځل مو د افغانستان بد حالت او د نظام سقوط لیدلی او نور باید په افغانستان دا تکرار نه شي .
محب ویلي، افغانستان باید داسې حکومت ولري،چې له نړیوالې ټولنې سره تعامل ولري او په اقتصادي لحاظ پر ځان بسیا وي.
محب زیاته کړې:«دغه ځل چې موږ دا بد وضیعت او سقوط ولیده، دا بیا باید په افغانستان کې تکرار نه شي. د افغانستان خلک بیا شاک ونه ویني او موږ وکولای شو،چې افغانستان کې داسې یو نظام حاکم وي،چې له هغې سره هم خلک خوشحاله وي او هم موږ وکولای شو،چې له نړۍ سره سم تعامل ولرو او هم له اقتصادي نظره پر خپل ځان اتکا وکولای شو.»
په ورته وخت کې محب وايي، دافغانستان د راتلونکي په اړه باید له پوره غور کار واخېستل شي او له هغې وروسته دې افغانانو ته داسې طرحه وړاندې شي،چې د هېواد د ستونزو بنسټیز حل په کې پروت وي.
هغه زیاتوي:« خپل شخصي فکر مو دا دی،چې اول موږ د افغانستان د راتلوونکې په اړه باید یو عمیق فکر وکړو او په دې وتوانیږو،چې افغانانو ته یوه داسې طرحه وړاندې شي،چې هغه د افغانستان دغه اساسي ستونزې حل کړي.»
د چارو یو شمېر شنونکي په دې اند دي،چې د افغانستان د راتلونکي په تړاو د ملي ډیالوګونو او پراخ تفاهم فرصت هغه مهال له لاس ووت،چې پخوانی حکومت په واک کې و او همدې څيرو یې مشري کوله او اوس کابل د یو اقدام لپاره امکانات په واک کې نه لري.
لیکوال او ژورنالیست عصمت قانع وايي:« تر کومه ځایه پورې،چې د یوه بین الافغاني ډیالوګ یا پراخ تفاهم امکانات و،هغه د پخواني جمهور رئیس محمد اشرف غني په وخت کې ضایع شول. البته دغه چانسونه،هم محب، محمد اشرف غني او د هغوی ټیم ضایع کړل او حالت جنګ ته ودریدل. د اوس لپاره کابل دغسې یوه حالت کې کابل دی،فکر نه کوم،چې د بین الافغاني ډیالوګ لپاره دې موږ پراخ امکانات ولرو. د نظام دسقوط اراده بهرنی وه،خو دوی یې د سقوط مامورین او دوی نظام سقوط کړی دی.»
څو ورځې وړاندې د ترکیې په انقرې ښار کې د پخواني حکومت د یو شمیر چارواکو او پخوانیو سیاسیونو هم په یوې ګډې اعلامیه کې له اسلامي امارت سره د مذاکراتو خبره کړې وه،هغه څه چې په اوسنیو شرایطو کې یې کارپوهان غیر عملي ګڼي.
د چارو یو شمېر کاروپوهانو په باور اوس ټول افغانستان له یوه مرکزي حکومت اداره کیږي او د مذاکراتو بحثونه له منځه تللي دي.
د چارو شنونکی عزیز معارج وايي:« دوی نور حق نه لري،چې د افغانستان په تړاو دې خبرې وکړي. دلته که هرڅه کیږي،که له نړیوالو سره تعامل دی، دولتي چارې دي، طالبان باید د ملت پاکو اوسپیڅلو کدرونو ته مراجعه وکړي او دوی کولای شي،د افغانستان په تړاو بحث او خبرې ولري،دا فرصتونه همدوی له لاسه ورکړي دي.»
څو ورځې وړاندې هم حمد الله محب له رسنیو سره په خبرو کې د تېر نظام د سقوط له امله په خپلو تیروتنو اعتراف کړی و او له ولس یې بښنه غوښتې وه.
محب ټينګار کړی د ی،چې هرهغه پخوانی چارواکی چې د نظام د سقوط پړه یې پرغاړه ده ،باید خپل مسوولیت ومني.
