د ریاست الوزرا سیاسي مرستیال کابل کې د ناروې له سفیر سره کتلي 

د افغانستان اسلامي امارت د ریاست الوزرا سیاسي مرستیال مولوي عبدالکبیر د شنبې پر ورځ د « ۱۴۰۱ کال د غويي پر ۳۱ مه» په کابل کې د ناروې له سفیر انډرس لینډمن سره کتنه کړې. 

لینډمن له عبدالکبیر سره کتنه کې د ټول شموله حکومت او ښځو ته د حقونو ورکولو غوښتنه کړې ده.

لیډمن پر خپله ټویټر پاڼه لیکلي، په دې لیدنه کې یې د افغانستان د راتلونکې لپاره د ازادو رسنیو پر اهمیت هم ټینګار کړی دی. 

اسلامي امارت بیا په یوه خپره کړې اعلامیه کې لیکلي، د ناروې سفیر ورسره په دولتي ادارو کې د ښځو د کار، د نجونو د زده‌ کړو، حجاب، ټول ګډونه حکومت، له افغان شخصیتونو سره د تماس کمېسیون د طرزالعمل او وروستیو کې د اداري تشکیلاتي چوکاټ څخه د ځینو اداراتو د حذف په اړه مالومات غوښتي دي.