د ملګرو ملتونو کارپوهان: امریکا دې د افغانستان کنګل کړې شتمني ازاده کړي 

د ملګرو ملتونو  کارپوهانو یوې ډلې په یوه خبرپاڼه کې د امریکا له متحده ایالتو غوښتي دي،چې د افغانستان بانک اووه میلیارده ډالر دې آزاد کړي،ترڅو په افغانستان کې له لسګونه میلیونه اړمنو خلکو سره بشري مرستې دوام پیدا کړي.

دوی د افغانستان پر روان بشري وضیعت ژوره اندېښنه ښودلې او د افغانستان د نیمایي وګړو ژوند یې له سخت بشري ګواښ سره مخ وباله.

یادو کارپوهانو  د بایډن له ادارې غوښتي دي،چې پر افغانستان دې خپل یو اړخیز بندیزونه لرې کړي،ترڅو مالي او د بشري مرستو رسولو فعالیتونه له سره پیل شي.

د خبرپاڼې یوه برخه:« که څه هم په افغانستان کې جنسیتي تاوتریخوالی له پخوا روان دی او پر نجونو او ښځو یې اغیز ډېر دی،د امریکا لخوا پر افغانستان لګیدلو بندیزونو،وچکالۍ او د اوسني واکمنانو له خوا جنیستي تبعیض یاد وضیعت لا پسې سخت کړی دی. پر امریکا غږ کوو،چې د افغانستان بشري ناورین ته په کتو دې خپلې پریکړې له سره واخلي.» 

خبرپاڼه کې ویل شوي،افغانستان اوس د ځمکې پر سر یوازینۍ هېواد دی،چې ۲۳ میلیونه وګړي یې بشري مرستو ته اړ دي او د ناسالمو خوړو تر ټولو لوړ شمیر لري.

خبرپاڼه کې وړاندې راغلي،چې پر افغانستان د بانکي بندیزونو له امله دلته فعالې بشري ادارې د نغدو پیسو له سخت کمښت کړیږي او مرستندویه هېوادونو په دې تړاو د ملګرو ملتونو امنیت شورا د معافیتونو سربېره هم یاده ستونزه نه ده حل کړې.

د خبرپاڼې یوه برخه:« د ملګرو ملتونو امنیت شورا د تېر کال ډیسمبر میاشت کې په یو پریکړه لیک کې افغانستان لپاره بشري معافیتونه اعلان کړل،خو  د هېوادونو او نړیوالو مالي بنسټونو لخوا په دې برخه کې د پام وړ پرمختګ نه دی لیدل شوی،ترڅو په افغانستان کې مالي بنسټونه تقویه شي او له بشري برخې سره مرسته وشي.» 

اخوا د افغانستان اسلامي امارت د ویاند مرستیال انعام الله سمنګانی بیا وايي،کنګل شوې پیسې د افغانانو حق دی او باید ژر تر ژره ازادې شي.

ملګرو ملتونو  کارپوهانو د امریکا پر متحده ایالتو غږ کړی  دی،چې خپلې وروستی پریکړې او یو اړخیز بندیزونه یې باید په افغانستان کې د بشري حقونو د نقض سبب نه شي او هڅه دې وکړي،چې د افغانستان بشري ناورین سره د مبارزې برخه کې له نړیوالو هڅو سره مل پاتې شي.

دوی د خبرپاڼې له خپرولو وړاندې په همدې تړاو د امریکا له متحد ایالتو حکومت سره غږیدلي هم دي، خو تر اوسه یې مثبت ځواب نه دی ترلاسه کړی.

دوی د امریکا متحده ایالتو هغه پریکړه هم غندلې ده،چې د افغانستان کنګل شوې نیمایي پیسې به په امریکا کې د ننه لګول کیږي.