د ملګرو ملتونو د ماشومانو ملاتړ صندوق یا یونیسف په افغانستان کې د ماشومانو پر وضعیت اندېښنه ښودلې او ټینګار کړی دی،تر هغې به دلته پاتې کیږي،چې هر ماشوم زده کړو ته لاسرسی پیدا کړي.
افغانستان کې که څه هم له شپږم ټولګي پورته نجونې لا ښوونځیو ته نه دي پرېښودل شوي، یونیسف وایي،د زده کړو برخه کې به خپلې هڅې ونه دروي.
د یونیسف د اړیکو برخې مسووله سم مورټ وايي، له تېرو اویا کلونو راهیسي په افغانستان کې فعالیت کوي او په وینا یې د افغان ماشومانو د زده کړو برخه کې به هر ممکنه لاره وآزمایي.\
مورټ زیاته کړه:« موږ به تر هغې په افغانستان کې خپل فعالیت ونه دروو،چې هر ماشوم ښوونځي ته نه وي تللی او زده کړې یې نه وي کړي. یونیسف د هر ماشوم لپاره په افغانستان کې دی.»
یونیسف په افغانستان کې د وروستیو بریدونو وروسته ویلي چې په تېره یوه اوونۍ کې له پنځوسو زیات ماشومان وژل شوي، چې نجونې او هلکان پکې شامل دي.
د یونیسف سیمه ییز مسوول جورج لاریا ګواښ کړی دی،چې ښایي د افغان ماشومانو پر وړاندې روان بشري وضعیت لا خراب شي.
