پرخوست او کونړ ولایتونو د پاکستان پوځي الوتکو له هوايي بریدونو وروسته، اوس د سیاسي چارو یو شمېر شنونکي وايي، اندیښنه لري،چې د پنجاب دغه کار به نور ګاونډیو ته هم دا جرات ورکړي،چې په بېلا بېلو پلمو سره پر افغان خاوره بریدونه وکړي.
دوی وايي، که له پاکستانه د شوي تیري بشپړ وضاحت ونه غوښتل شي او د نړیوالو قوانینو پر اساس ورسره چلن ونه شي، لرې نه ده،چې د افغانستان غربي او شمالي ګاونډیان به هم په دې پلمه،چې له افغانستانه ورته ګواښ متوجه دی،پرافغان خاوره به بریدونه وکړي .
د ولسي جرګې پخوانی غړی کمال ناصر اصولي وايي، اسلامي امارت باید اوس دا ثابته کړي،چې افغانستان کې ځواکمن دولت موجود دی او له خپلې ځمکنۍ پشپړتیا ساتنه کوي. اصولي زیاته کړه:« طالبان اوس د افغانستان حاکمان دي او استازیتوب یې کوي او اوس دې ثابت کړي،چې دوی واکمنان دي او دولت دی. د پاکستان جبر ته باید جواب ورکړي،که داسې ونه شي،د پاکستان دغه کار به نور هېوادونه هم دې وهڅوي،چې خپل مخالفین په افغان خاوره کې بمبار کړي.»
ځینې نور بیا په دې اند دي،چې د نړیوالو قوانینو او اصولو پربنسټ کابل د دې حق لري، چې له اسلام اباده پر افغان خاوره د شوي برید غرامت واخلي او حکومت باید دا ثابته کړي،چې د خپل ولس او خاورې ساتلو مسوولیت مني.
د سیاسي چارو شنونکی مختار هاتف وایي:« دا د یوه دولت حق دی،چې په نړیواله کچه او د نړیوالو قوانینو تر سیوري لاندې حد اقل له پاکستانه د غرامت پوښتنه وکړي او دامسولیت د دولت دی.»
پوځي کارپوه صادق شینواری وايي، په اوسنیو شرایطو کې د پاکستان پر وړاندې بالمثل عمل نه د کابل او نه هم د اسلام اباد پر ګټه دی او باید رامنځ ته شوې ستونزه د ډیپلوماتیکو لارو حل شي، خو اسلامي امارت دې یو ځل بیا ټولو ګاونډیو ته ډاډ ورکړي،چې له افغانستانه هېچ چاته ګواښ متوجه نه دی.
شینواري زیاته کړه:« د افغانستان لپاره د پاکستان پر وړاندې باالمثله عمل په ګټه نه دی او باید دغه ستونزه له ډیپلوماتیکې له لارې حل کړي، نه ده جګړې له لارې. اسلامي امارت باید ټولو ګاونډيو ته یو ځل بیا ډاډ ورکړي،چې د افغانستان له خاورې ورته هیڅ ډول خطر نه دی متوجه.»
اسلامي مارت بیا په خپلې خبرې یو ځل بیا ټینګار کوي او ډاډ ورکوي،چې د افغانستان خاوره به د هیچ چا پرضد ونه کارول شي.
د اسلامي امارت ویاند ذبیح الله مجاهد وايي:« موږ هیچ چاته اجازه نه ورکوو،چې دافغانستان خاوره د بل هېواد پر ضد استفاده کړي او ګټه ترې واخلي.»
دغه اندیښنې له هغې وروسته راپورته شوي،چې درې ورځې وړاندې د پاکستان پوځي الوتکو د خوست ولایت په سپیرې او د کونړ ولایت په شلتن ولسوالیو هوايي بریدونه وکړل، چې د ښځو او ماشومانو په ګډون یې له ۵۰ زیاتو ملکي وګړو ته مرګ ژوبله واړوله.
