پر خوست او کونړ ولایتونو د پاکستان پوځي الوتکو هوایي بریدونو عام افغانان په غوسه کړي او له اسلامي امارته غواړي،چې د یاد هېواد پر وړاندې دې عملي اقدام وکړي.
دوی وایي،د پاکستان وروستي بریدونه پر افغان خاوره ښکاره تیری دی او که اسلامي امارت یې مخه و نه نیسي دوی به خپل اقدام وکړي.
دوی وایي افغانستان یو جنګ ځپلی هېواد دی،چې د بلې جګړې وس نه لري، نو اسلامي امارت ته په کار ده،چې د دا ډول بریدګرو لاسونه ورلنډ کړي.
د هرات ولایت یو تن اوسېدونکی وايي:« له اسلامي امارت غوښتنه کوو،چې د پاکستان د دا ډول بریدونو مخه ونیسي او که یې مخه نه شي نیولی موږ اړ کیږو،چې په خپل لاس په کار شو.
د هرات ولایتو یو بل اوسېدونکی بیا وايي:« افغانستان یو جنګ ځپلی هېواد دی او د نورو هېوادونو څخه دا ډول بریدونه د غندلو وړ دي. له اسلامي امارته مو غوښتنه دا ده،چې د دا ډول بریدګرو لاسونه دې پرې کړي.»
ځینې نور بیا وایي،د سفیر احضارول بسنه نه کوي او اسلامي امارت باید دا ځل پاکستان ته غاښ ماتونکی ځواب ورکړي
د کندهار ولایت یو تن اوسېدونکی وايي:«موږ له اسلامي امارته غواړو،چې د پاکستان دا ډول بریدونو ته دې غاښ ماتونکی ځواب ورکړي. د پاکستان دا برید پر کونړ او خوست د غندلو وړ دی او موږ یې غندو.»
د ننګرهار ولایتو یو تن اوسېدونکی وايي:«اسلامي امارت دې د پاکستان دې تیري ته ځواب ووایي او زموږ د خاورې پوښتنه دې وکړي،که داسې ونه شي موږ اړ کیږو،چې په خپله لاس په کار شو. په احضارولو څه نه کیږي او اسلامي امارت دې د پاکستان پر وړاندې عملي اقدام وکړي.»
د هېواد د شمال اوسیدونکي هم له اسلامي امارته ورته غوښتنه کوي او زیاتوي،چې دا ډول بریدونه د افغانستان یووالی آزمایي.
د کندز ولایت یو تن اوسېدونکی وايي:« له نړیوالې ټولنې غواړو،چې د پاکستان پر وړاندې اقدام وکړي او موږ اوس یو موټي خلک یو او یوازې دې ته په تمه یو،چې اسلامي امارت موږ ته امر ورکړي. د افغانستان ټول خلک د پاکستان پر وړاندې جګړې ته چمتو دي.»
د پاکستان لخوا پر کونړ که څه هم وخت ناوخت راکټي بریدونه کیږي،خو دا لومړی ځل دی چې یاد هېواد پر افغان خاوره هوایي بریدونه کوي، هغه څه چې د عامو افغانانو غوسه یې تر بل هر وخت ډېره پارولې ده.
