په سوېل کې د پکتیا ولایت مرکز ګردیز په یو شمیر سیمو کې د کور پر کور پلټنې عملیات د چهارشنبې پر ورځ د « ۱۴۰۱ کال د وري پر ۲۴ مه» پیل شول او تر څو ورځو به دوام وکړي.
د یاد ولایت امنیه قوماندانۍ د امنیت امر کرامت الله وايي، تر اوسه پورې د ولایت پر کچه د کور په کور پلټنې عملیاتو پریکړه نه ده شوې،خو ګردیز ښار کې داسې حساسې سیمې شته دی،چې تر شک لاندې دي او باید وپلټل شي.
کرامت الله زیاته کړه:«دا مهال خو دلته ګردیز ښار کې هغه حساسې سیمې چې تر شک لاندې دي،موږ یې پلټو او باید وپلټل شي. د ټول ولایت پر کچه د کور په کور پلټنې عملیاتو پریکړه تر اوسه پورې نه ده شوې.»
کرامت الله وایي،هېڅ ډول امنیتي ننګونې نشته دی او د پلټنې عملیاتو موخه یوازې د بیت المال وسلو را ټولول دي او تر دا مهاله ښیې لاسته راوړنې لري.
هغه زیاته کړه:« دلته د بیت المال اړوند شیان باید بیت المال ته وسپارل شي. خلک خوشاله دي،هغوی وایي،چې تاسو باید مخکې دا عملیات پیل کړي وای،تر څو وسلې ضایع شوې نه وای.»
ځايي خلک وايي، د پلټنې پرمهال د امنیتي ځواکونو له چلن راضي دي .
د ګردیز ښار یو تن اوسېدونکی وايي:« ښځې ورسره وي، د تلاشي پر مهال ښه وضعیت کوي، نور خو څوک چاته کور نه شي ورکولی. موږ ترې راضي او الله دې دوی ته توفیق ورکړي،چې امنیت ټینګ کړي.»
د ګردیز ښار یو بل اوسېدونکی بیا وايي:« د اسلامي امارت له دغې پریکړې او د پلټنې عملیاتو پر مهال موږ ته هیڅ ډول تکلیف نه دی رسیدلی. موږ ترې راضي یو.»
