د لغمان والي وايي، د دغې ځمکې په اجارې ورکولو سره په سلګونه هېوادوالو ته د کار زمینه هم برابره شوې او هم یې له اړخه د اجارې ګټه د دولت خزانې ته ځي.
هغه زیاته کړه:« ډېر ځوانان په کې مصروفه شول. خلکو ته کاروبار پیدا شو. هغه ځوانان چې وړاندې ایران ته تلل، اوس اړتیا نه لري،چې ایران ته ولاړ شي. دلته په خپل هېواد کې خدمت کوي. خپل هېواد یې هم اباد کړ. له خپلو ماشومان سره هم نږدې دي. بله ګټه مو دا وکړه،چې دا ځمکه مو له غصب راوګرځوله.»
د اسلامي امارت لخوا خلکو ته د دغو ځمکو په ورکولو سره ډېری ځوانان په کار بوخت شوي او خوښ دي،چې پر کور دننه او خپل ولایت کې ورته د ګټې وټې زمینه برابره ده.
یو تن بزګر وايي:«دلته مو فارمونه جوړ کړي،بادرنګ مو په کې کرلي دي او اوس حاصل ورکولو ته رسېدلي دي. له والي مننه کوو،چې تل زموږ د هڅونې لپاره راځي. هغه موږ دې ته هڅوي،چې هېواد اباد کړو.»
د لغمان د دغې سیمې اوسېدونکي زیات خوښ دي،چې ګاونډیو هېوادونو ته د کارونو په موخه له تګه ستانه شوي دي او په خپل ولایت کې ورته د کار زمینه برابره شوې .
د شنو خونو مالکان او کارکوونکي وايي، د هېواد ډېری ولایتونو ته ترکارۍ رسوي او په څو ورځو کې به یې تر پاکستانه هم صادر کړي.
بزګر سیداجان وايي:« زه مخکې په ایران کې وم، خو له ایرانه بېرته هېواد ته راستون شوم. اوس په خپل هېواد کې مزدوري کوم او ښه په کې خوشاله یم.»
د لغمان ولایت اوسېدونکي وايي،د اسلامي امارت مسوولین دې ورته پر کور دننه د کار فرصتونه برابر کړي، ترڅو نورو هېوادونو ته له ناقانونه کډوالۍ وژغورل شي او هم به په خپل کور او ولایت کې ورته د ګټې وټې زمینه برابره شي.
