د افغانستان اسلامي امارت بهرنیو چارو وزارت د درېیم ریاست مشر ذاکر جلالي وايي، په مسکو کې د افغانستان سفارت رسمآ د افغانستان نوي سفیر ته سپارل شوی دی او له دې وروسته ددواړو هیوادونو ترمنځ داړیکو د لا ټینګښت لپاره به کار کوي.
جلالي وايي، روسیه په سیمه او نړۍ کې یو مهم هېواد دی او له دې کار سره یې افغانستان نړیوالې رسمیت پيژندنې ته ور نږدې کړ.
جلالي زیاته کړه:« پرون په مسکو کې د افغانستان سفارت د اسلامي امارت له لوري استول شوي ډیپلومات ته رسما وسپارل شو او له دې وروسته به مسکو کې د افغانستان سفارت د روسیې او افغانستان د اړیکو په تامین کې مثبت رول ولوبوي. همدا راز له نورو هېوادونو سره د اړیکو په تامین کې هم مثبت رول ولري،نو پر دې اساس موږ ورځ تربلې په ډیپلوماتیک ډګر کې د بشپړې رسمیت پیژندنې په لور ګامونه اخلو او واټن لنډوو.»
د چارو یو شمېر شنونکي بیا په دې باور دي،چې د نړۍ تازه شرایطو او د ځواکمنو هېوادونو ترمنځ سیالیو افغانستان ته د نړیوالې رسمیت پيژندنې شرایط برابر کړي دي،خو کابل ته په کار ده،چې هغه برخې هم بشپړې او معیاري کړي،چې په دغه برخه کې نړۍ ته مهمې دي.
د سیاسي چارو شنونکی حکمت الله حکمت وايي:«نړیوالو شرایطو ته په کتو د اسلامي امارت د رسمیت پیژندنې مسله له بل هر وخت اوس په ښه حال کې ده،د دې لپاره،چې په عملي توګه دغه کار له ټولو هېوادونو سره همزمان وشي،موږ باید ځینې کورنۍ دندې ترسره کړو او دغه کورنۍ دندې د خپل ملت رضایت لپاره او له نړیوالو د مشروعیت اخېستلو لپاره اړینې دي.له ولس سره ډیالوګ، د ښوونې او روزنې پروسې سراسري پیل ، د مرستو شفاف ویش او د امنیت د ډاډمن کیدو لپاره د ولسونو همکاري.»
پخوانی ډیپلومات عزیز معارج بیا وايي، په مسکو کې کابل ته د افغانستان د سفارت سپارل به پر نورې نړۍ هم اغیزه وکړي او د افغانستان رسمیت پیژندنې ته به یې وهڅوي . معارج وايي،د هېوادونو ترمنځ د افغانستان پر سر سیاسي سیالیو د کابل لپاره ښه فرصت رامنځ ته کړی او اوسنی حکومت باید ترې ګټه واخلي.
معارج زیاته کړه:«چین او روسیې د افغانستان یو ډيپلومات منلی دی او شرق او غرب ټکرو ته په کتو سره دوی غواړي،چې طالبانو ته امتیاز ورکړي او ځان ته یې جذب کړي. دا کیدای شي،چې په غربي نړۍ ناټو او امریکا هم تاثر وکړي او هغوی هم وهڅوي،چې خپل ډیپلوماتان کابل ته راولیږي او د افغانستان د نوي حکومت ډیپلوماتان په خپلو هېوادونو کې ومني او له طالبانو سره ډیپلوماتیکې اړیکې جوړې کړي.»
پاکستان،ایران،ترکمنستان،قرقزسستان او چین هغه هېوادونه دي،چې د افغانستان د نوي حکومت ډیپلوماتان یې په خپله خاوره کې منلي،خو روسیه یوازینی هېواد دی،چې د ډیپلوماتانو د منلو ترڅنګ یې د افغانستان سفارت هم ورسپارلی دی،چې له دې سره د افغانستان درسمیت پيژندنې او د نړیوالو اقتصادي بندیزونو د لرې کولو هیلې زیاتې شوې دي.
