د سیاسي چارو یو شمېر کارپوهان بیا وايي، پاکستان د افغانستان له تیرو نظامونو سره پټ روابط درلودل او له دغو اړیکو نه په ګټې اخیستنې سره له کرښې راوښتی دی او د افغانستان خاوره یې لاندې کړې ده .
پخوانی نظامي سرور نیازی وايي:« تیرو نظامونو له ګاونډیو هېوادونو سره پټ روابط درلودل او هغوی هم له دغې موقعې نه ګټه واخېسته او څو کیلومتره د افغانستان خاورې ته رادننه شوي دي، اوس نه یوازې دا چې باید ګاونډیو ته اجازه ورنه کړل شي، بلکې زموږ نیولې خاوره هم باید ترې واخېستل شي .»
کارپوهان وايي، په تیرو شلو کلونوکې اسلام اباد به یوازې د کابل له اعتراضي لیک سره مخامخ و،خو اوس له داسې یو ځواک سره اوښتی دی،چې تازه یې د خپلې خپلواکۍ لپاره د امریکا په مشرۍ ناټو ماته کړې.
له پاکستان سره دډیورنډ فرضي کرښې په اوږدو کې د رامنځ ته شویو ستونزو د حل لپاره پر سیاسي حل لاره ټینګار کیږي او غوښتنه داده،چې دواړه لوري باید له دیپلوماتیکو چینلونو مخ ته لاړشي.
د سیاسي چارو کارپوه حکمت الله حکمت وايي:« هغه څه،چې په نیمروز کې پیښ شول دا د پاکستانیانو د دخالت په مانا باندې و، پاکستانیان دې دا خبره واوري،که پرون دوی د یو حکومت له اعتراضي لیک سره مخامخ کیدل،خو نن د یوه ملت له ارادې سره مخامخ کیږي. نن له داسې پوځ سره مخامخ کیږي،چې هغه د دغې خاورې د ساتلو لپاره د نړۍ ترټولو ستر ځواک امریکا او ناټو په ګونډو کړ او دوی دې پوه شي،چې د پنجاب پر وړاندې د دغه پوځ دریدل ساده خبره ده ،خو له پاکستان سره دې زموږ ستونزې د ډیپلوماتیکو چینلونو له لارې حل شي.»
خو د افغانستان اسلامي امارت مرستیال ویاند بلال کریمي بیا په نیمروز کې د افغانستان – پاکستان ترمنځ د رامنځ ته شوې جګړې په تړاو ډېر جزئیات نه ورکوي او وړه پیښه یې ګڼي چې په وینایې دواړه لوري یې د حل پر لارو کار کوي.
کریمي وايي،ولسونو ته ډاډ ورکوي،چې له خپلې خاروې نه به په کلکه دفاع او ساتنه کوي.
کریمي زیاته کړه:« یوه وړه پیښه هلته سیمه کې رامنځ ته شوې ده. د دواړو لوریو مسوولین هڅه کوي،چې رسیدنه ګي وکړي او هېله شته،چې حل شي. موږ نه غواړو،چې له ګاونډیو سره په مناقشه کې ووسو .»
دوه ورځې وړاندې د افغان او پاکستاني پوځیانو ترمنځ د نیمروز ولایت ډیورنډ کرښې ته نږدې سیمه کې هغه مهال نښته پيل شوه،چې پاکستاني لوري د افغانستان په خاوره د اغزن تار غځولو کار پيل کړ او د یوه کلي د لیږدولو غوښتنه یې وکړه،چې دافغان لوري له سخت غبرګون سره مخ شول او د کار مخنیوی یې کړی دی.
