Skip to content
په هېواد کې د نجونو پر مخ د منځنیو ښوونځیو او لیسو بندېدل لا هم د نړیوالو له پام غورځېدلې موضوع نه ده او یاده پریکړه تازه د اروپایي ټولنې پارلمان په کلکه وغندله.
د اروپایي ټولنې پارلمان د پنج شنبې د «۱۴۰۱ کال د وري پر ۱۸ مه » په یوه ګډ پریکړه لیک کې د اسلامي امارت هغو ژمنو ته په اشارې ویلي،چې نه دي عملي شوي،چې د ښوونې برخه کې یې کړې وې.
پریکړه لیک کې راغلي دي،چې د طالبانو له خوا پر ښځو روان بندیزونو دې ژر تر ژره لرې شي.
د اروپايي ټولنې پارلمان پریکړه لیک یوه برخه:«د پارلمان غړي په افغانستان کې د ښځو مخ په خرابېدو هغه وضیعت غندنه کوي،چې د طالبانو واک ته رسېدو را وروسته رامنځته شوی دی. اروپایي ټولنې پارلمان له عام ژوند څخه د ښځو لرې ساتل او دوی ته زده کړو، کار، سفر کولو او روغتیایي حق نه ورکول،په کلکه غندي.»
د اروپایي پارلمان غړو په دې پریکړه لیک د زده کړو ترڅنګ د ښځو په تړاو د هغې پریکړې په تړاو هم اندیښنه ښودلې ده،چې له مخې یې، ښځې له محرم پرته له ۴۵ کیلو متره ډېر سفر نه شي کولای.
دوی وایي،د اسلامي امارت وروستۍ پریکړې افغانستان کې د بشري حقونو وضیعت لا پسې خرابوي.
په پریکړه لیک کې د هغو ښځو او نجونو ستاینه هم شوې ده،چې سړکونو ته راوتلي او د خپلو حقونو غوښتنه یې کړې ده.
د اروپايي ټولنې پارلمان پریکړه لیک یوه برخه:«د پارلمان غړي د هغو نجونو او ښځو زړورتیا هم ستایي،چې سړکونو ته راوتلي او د وروستیو پرمختګونو او طالبانو پریکړو پر وړاندې یې غږ پورته کړی دی. د پارلمان غړي پر اروپایي ټولنې او غړو هېوادونو غږ کوي،چې په افغانستان کې دا ډول ښځو او د ښځو حقونو فعالانو ملاتړ وکړي.»
د اروپایي ټولنې پارلمان غړو په دې پریکړه لیک کې همداراز ویلي، کابل کې یې د اروپایي ټولنې پلاوي دفتر پرانېستلو څخه موخه د بشري مرستو تنظیم کول او په افغانستان کې له بشري وضیعته څارنه ده، نه د سرپرست حکومت رسمیت پیژندنه په مانا.
په ورته مهال د پوهنې وزارت ویاند عزیز ریان وايي،دوی د ښوونځيو پرانېستلو لپاره چمتووالی لري، خو په دې تړاو وروستۍ پريکړه د دې وزرات د صلاحيتونو پورته ده او د اسلامي امارت د رهبرۍ په واک ده.
ریان زیاته کړه:« لکه څنګه چې تاسې په جریان کې یاست، له اووم تر ډولسم ټولګې پورې د نجونو ښوونځي د لنډمهال لپاره ځنډول شوي دي. کله چې د اسلامي امارت مشرتابه حکم وکړي،د پوهنې وزارت چمتو دی،چې د هېواد د نجونو ښوونځي له اووم تر ډولسم ټولګې پورې پرانېزي.»
د اسلامي امارات له لورې د شپږم ټولګې پورته د ښوونځيو بنديدو پريکړه په کور دننه او بهر د زيات غبرګونو سره لا مل ده. خو د غبرګونو سربیره بیا هم اسلامي امارت د ښوونځیو د شروع کيدو په اړه خپله پريکړه نه ده بدله کړې، او څه دپاسه دوه سوه ورځو راهیسي لا هم د انجونو پر مخ د ښوونځيو دروازې تړلې پاتې دي.
