Skip to content
له افغانستانه له وتلو ۸ میاشتې وروسته د امریکا متحده ایالتو د پوځ ځانګړو عملیاتو قوماندان جنرال ریچارډ کلارک ویلي، افغانستان کې یې د نړیوالو ترهګرو د څارلو وړتیا کمزورې شوې ده او د دې لپاره اوس اړتیا ده،چې افغانستان ته په نږدې هېوادونو کې نظامي اډې ولري.
کلارک د امریکا متحده ایالتو د سنا دفاعي کمیسیون ته ویلي، د د افغانستان څار لپاره د اډو لپاره یې هڅو د اوس لپاره پایله نه درلوده.
خو د سیاسي چارو یو شمېر کارپوهان بیا وايي، په سیمه کې د غرب سیاستونه بدل شوي،خو د چین،روسیې او هند نویو خوځښتونو ته په کتو ښایي،هېڅ هېواد پهخپله خاوره کې امریکايي اډې ته ځای ورنه کړي.
د سیاسي چارو کارپوه حمت الله حکمت وايي:« زه فکر کوم،چې امریکایان د اوس لپاره په سیمه کې ځای نه لري،چې څوک اډه ورته ورکړي،ځکه له د امریکا له متحده ایالتو سره، چین، روسیه،هند او نور هېوادونه په سیاسي،اقتصادي او نظامي جګړه باندې بوخت دي. دا شرایط د دې نه دي،چې د امریکا متحده ایالت په دې سیمه کې د پوځي اډو خوبونه وګوري.»
سیاسي چارو کارپوه عزیز ستانکزی وايي:« زما په اند، د اوس لپاره په سویلي او منځنۍ اسیا کې د امریکا متحده ایالتو پوځي اډو رامنځته کول ممکن نه دي. نو په راتلوونکې کې به وګورو،چې نړۍ له څه بدلونونو سره مخ کېږي. »
د امریکا متحده ایالتو له وړاندې ویلي وو،چې افغانستان به د سیمې له یوه هېواد تر څار لاندې نیسي.
په دې اړه خبرې د پاکستان سره روانې وې،هغه هېواد چې د امریکا متحده ایالتو ته یې دوه لسیزې وړاندې په افغانستان د برید زمینه برابره کړې وه.
د افغانستان اسلامي امارت د ویاند مرستیال انعام الله سمنګانی وايي، افغانستان کې کوم هېواد ته ګواښ نه شته دی.
سمنګاني زیاتوي:« الحمد الله په ټول هېواد کې امنیت تامین دی. داسې هېڅ ډله نه شته دی،چې خپله د افغانستان، سیمې او نړۍ لپاره ګواښ وي. اسلامي امارت لکه څنګه چې ژمنه کړې،هېچ چاته به اجازه ورنه کړي،چې د افغانستان له خاورې په ګټنې د افغانانو،سیمې او نړۍ امنیت ته زیان ورسوي او هېڅ څوک دې په دې برخه کې وېره نه لري. »
د امریکا متحده ایالتو بار بار په سیمه او افغانستان کې د القاعده او داعش په اړه خپله اندېښنه څرګنده کړې ده.
د اسلامي امارت او د امریکا متحده ایالتو ترمنځ د دوحې هوکړه هم شته دی،چې په کې اسلامي امارت د افغانستان له خاورې امریکامتحده ایالتو ته د کوم ګواښ د اوښتو تضمین ورکړی دی،چې پراساس یې ټول بهرني ځواکونه له افغانستانه ووتل.
