Skip to content
د ننګرهار ولایت په مرکز جلال اباد ښار کې اوسېدونکي پر سوداګرو او هټۍ والو نیوکې کوي،چې روژه کې یې د خوراکي توکو بیې دوه برابره لوړې کړي او ډېری خلک یې د اخېستلو توان نه لري.
ښاریان وایي،سوداګر او هټيوال دې د عامو خلکو بد وضعیت نه غلطه استفاده نه کوي او په خپل سر دې نرخونه نه لوړوي.
د جلال اباد ښار یوتن اوسېدونکی وايي:« موږ له ټولو افغانانو هېله کوو،که هغه هر کاروبار کوي، که تجار دی، که موټروان دی، باید له بې وزله سره لوبې ونه کړي.»
د جلال اباد ښار یو بل اوسېدونکی بیا وايي:« موږ او تاسو څه چې د کور د اولویت توکي اخلو، دا د ټولو بیې لوړې شوي دي.»
هټيوال مني،چې توکي په کمو بیو رانیسي او په لوړو یې پلوري،خو په خبره یې چې دولت دې پرې څار وکړي او ټاکلې نرخنامې دې ورته وویشي.
د جلال اباد ښار کې یو تن هټۍ وال وايي:« دا توکي نه پرون راغلي او نه له دې څو ورځې وړاندې،هر کانټينر مال چې راځي،شااوخوا دوه میاشتې وخت نیسي.
دوه میاشتې وړاندې دا توکي راغلي دي. زه له تجارانو هېله کوم،چې توکي دې پر لوړه بیه نه پلوري. له هټۍ والو هېله کوم،چې د خدای ج په خاطر،چې په کومه بیه مو توکي اخېستي، ۳۰ افغانۍ ګټه پرې واچوئ.توکي پر ۳۰ یا ۴۰ افغانۍ ګټه وپلورئ، په ۳۰۰ یا ۴۰۰ ګټې له پلورلو ډډه وکړئ.»
بل لوري ته د ننګرهار ښاروالۍ ویاند بختي جان مراد وایي تازه یې د لسو ریاستوونو له لورې په یو ګډ کمسیون جوړولو باندې کار روان دی،ترڅو ښار کې توکو ته بیې وټاکي او بیا ترې څارنه وکړي.
مراد زیاته کړه:« د بیو مهار په اړه د جلال اباد ښاروالۍ یو ګډ کمېسیون د یوولس ریاستونو په استازيتوب رامنځته کړی دی. په دې کمېسیون کې د بېلابېلو ریاستونو استازي موجود دي. دوی په ښار کې له بېلابېلو برخو، سرایونو، قصابانو، خیاطانو او له نوروهټۍ والو او بېلابېلو صنفونو څارنه کوي.»
یوازې جلال اباد ښار نه دی،د کابل په ګډون د هېواد لویو ښارونو کې هرکال د روژې په رارسیدو سوداګراو هټۍوال احتکار کوي او پرر خپل سر نرخونه ټاکي، چې دغې چارې د عامو افغانانو ژوند سخت کړی او په اړوند ادارو نیوکې لري، چې په بازار څار نه لري.
