د امنیت شور لس غړیو هېوادونو په یوه ګډه خبرپاڼه کې له اسلامي امارته وغوښتل،چې ښوونځي پرانیزي او د نجونو لپاره خوندي چاپیریال برابر کړي.
په ملګرو ملتونو کې د ناروې دایمي استازې مونا جوول و ايي:« روانه اوونۍ میلیونونه نجونې په افغانستان کې له اوښکو په ډکو سترګو له ښوونځيو پاتې شوې. د افغانستان د باثباته او امن راتلونکي لپاره تاسې د استعدادونو او بشري قوې مخه مه نیسئ. دغه مخنیوی د ښوونیزو مرکزونو بند ساتل دي. ښوونه د یوې ټولنې مهم اړخ دی. طالبانو ته زموږ پیغام دا دی،چې نجونې ښوونځیو ته پریږدي او هغوی ته خوندي چاپیریال برابر کړي.»
د امنیت شورا غړي هېوادونه وايي،یوناما د اسلامي امارت له لوري د ژمنو عملي کولو په خاطر کابل کې خپل ماموریت غځولی،ؤخو دا ډول تحرکات به یې دریځ زیانمن کړي.
اخوا د سیاسي چارو یو شمېر کارپوهان په دې نظر دي،چې هېواد امن دی او باید له دې فرصته، مثبته ګټه پورته شي.
د سیاسي چارو کارپوه حبیب الله جانبدار وايي:« د افغانستان اسلامي امارت باید دې غوښتنو ته اعتنا وکړي او اوس چې په افغانستان کې امن راغلی دی، دا شرایط اماده دي، چې نجونې ښوونځیو ته ولاړې شي. هېڅ ډول ستونزه نه لیدل کیږي،نو په دې حالاتو کې د خلکو غوښتنو او د ملګرو ملتونو تشویشونو ته پاملرنه اړینه ده.» ځ
ځنې نور بیا وايي، که د نجونو لپاره تر شپږم ټولګي پورته زده کړو اجازه ور نه کړل شي، د سرپرست حکومت د رسمیت پيژندنې او نړیوال تعامل لپاره هلې ځلې به زیانمنې شي.
د سیاسي چارو کارپوه بلال فاطمي وايي:« که دوی دا ښوونځي نه پرانیزي،نو هغوی چې کومې مرستې کوي، کومه همکاري کوي،هغه وسپموي. ان د افغانستان د رسميت پیژندنې په برخه کې چې کومې ژمنې شوې دي، په هغوی کې به هم ستونزې رامنځ ته شي.»
نظرونه دا دي،چې د ښوونځيو تړلو په کور دننه هم د خلکو زړونه مات کړي او پایلې به یې تر دې هم ګواښونکې وي.
د سیاسي چارو کارپوه یحیی چاوش وايي:« لکه څنګه چې مخکې د خلکو پر وینه سوداګري وشوه، اوس دې د خلکو پر اوښکو سوداګري وشي. د افغانستان د خلکو زړه ماتول دومره اسانه او ساده خبره نه ده او پایلې به یې تر دې هم ډېرې خطرناکې اوسي.»
بل لور ته د ملګرو ملتونو عالي کمیشنرې میشل بشلیټ د اسلامي امارت چارواکي د خپلو ژمنو په عملي کولو کې پاتې بللي او ویلي یې دي، څو اوونۍ وړاندې کابل ته د خپل سفر پر مهال ورسره اسلامي امارت د نجونو ښوونځيو د پیل ژمنه کړې وه.
