په چین کې د افغانستان په اړه ځانګړې ناسته جوړېږي

ټاکل شوې ده، د افغانستان د ګاونډیو هېوادونو درېیمه ناسته راتلونکې اوونۍ د چین په پلازمېنه بېجینګ کې د روسیې، چین، ایران، پاکستان، تاجکستان، ترکمنستان او ازبکستان د بهرنیو چارو وزیرانو په ګډون جوړه شي.

د چین د بهرنیو چارو وزارت وايي، په‌ دې ناسته کې به له افغانستان سره پر بشري مرستو او په دغه هېواد کې د سیاسي ننګونو پر حل خبرې شوي.

په ورته مهال افغان حکومت له ګاونډيو هېوادونو سره د اسلامي امارت د اړیکو د پراختیا لپاره د یادې غونډې جوړېدل ګټور ګڼي.

د چین په جوړېدونکې ناسته کې د اسلامي امارت د بهرنیو چارو سرپرست وزیر امیرخان متقي ته هم د ګډون بلنه ورکړل شوې ده.

مسکو هم ویلي، د افغانستان د ګاونډیو هېوادونو په غونډه کې به د دې هېواد د بهرنیو چارو وزیر سرګي لاوروف ګډون وکړي او له ګاونډیو هېوادونو سره به د ترهګرۍ پر وړاندې د مبارزې پر لارو چارو خبرې وکړي.

اخوا هند بیا وايي، د افغانستان په تړاو په چین کې جوړېدونکي کنفرانس ته د ګډون بلنه نه ده ورکړل شوې.