Skip to content
زابل د هېواد په سوېل کې پروت هغه ولایت دی،چې اوسېدونکي یې د تېرو جګړو تر څنګ وروستۍ وچکالۍ هم سخت ځپلي دي.
د یاد ولایت د کډوالو او بېرته راستنېدونکو ادارې مشر حمدالله صمیم وايي، په دغه ولایت کې د تېرو جګړو تر څنګ د سختې او اوږدې اوچکالۍ له امله شااوخوا ۳زره بې ځایه شویو کورنیو تر څنګ زرګونه نورې غربت ځپلې کورنۍ شته دی،چې اوږدمهاله مرستو ته اړتیا لري.
صمیم زیاتوي:« زموږ د رسمي ارقامو له مخې، د تېرو جګړو او وچکالي له امله ۳زره کورنۍ بې ځایه شوي دي. د دغو کورنیو تر څنګ مو زرګونو نورو کورنیو ته هم مرستې رسولي دي.»
د پېښو پر وړاندې د چمتوالي ادارې مشر زار محمد خالد بیا وايي، پر اړمنو کورنیو د مرستو وېش لړۍ شفافه ده او یاد بهیر د ځانګړي پلاوي له خوا څارل کېږي.
خالد زیاتوي:« د سروې او وېش پر مهال پوره شفافیت موجود دی.د همدې شفافیت لپاره مو د اړوند سيمو د ملا امانو، د ولایت استازو او نورو اړوند ارګانونو یو ګډ پلاوی د مرستې دغه بهیر څاري. موږ پوره هڅه کوو،چې مرستې مستحقو کورنیو ته ورسېږي.»
په همدې حال کې هغه کورنۍ چې د خوراکي او غیر خوراکي توکو مرستې يې تر لاسه کړي، د نورو مرستو غوښتنه لري.
د زابل ولایت یوتن اوسېدونکی وايي:« موږ د یادو مرستو له امله مننه کوو. موږ ډېر خوښ یو،خو دغه مرستې لنډ مهاله دي. موږ غوښتنه کوو،چې یادې مرستې دې زیاتې شي.»
تر دې وړاندې د دغه ولایت چارواکو خبر ور کړی وه، چې له تېرو شپږو میاشتو راهیسې يې تر اووه زرو زیاتو کورنیو ته مرستې رسولي او د مرستو رسولو دغه لړۍ لا هم دوام لري.
د مسوولینو په خبره،یادې مرستې چې د نړيوالو مرستندویه ادارو له لورې تر سره کېږي، په کې د خوراکي او غیر خوراکي توکو تر څنګ د نغدي پیسو مرستې هم شاملې دي.
