Skip to content
د امریکا، بریتانیا، جرمني، فرانسې، ایټالیا، کاناډا او جاپان د بهرنیو چارو وزیرانو په یوه ګډه خبرپاڼه کې د نجونو ښوونځيو په اړه د اسلامي امارت پر پریکړې خواشیني څرګنده کړې او د بېرته اخیستو غوښتنه یې کړې ده.
په خبرپاڼه کې راغلي، چې د اسلامي امارت لخوا دا اقدام له هغو پریکړو او ژمنو سره په ښکاره ټکر کې دی،چې له افغانانو او نړیوالې ټولنې سره یې کړي دي.
د ګډې خبرپاڼې یوه برخه:«موږ پر طالبانو غږ کوو،چې خپله پریکړه دې له سره واخلي،ځکه پایلې به یې د افغانستان اقتصادي وده ټکنۍ کړي. د طالبانو دا پریکړه به د دوی هغه غوښتنې هم اغیزمنې کړي،چې د نړیوال سیاسي ملاتړ او کورني ملاتړ برخه کې یې لري.»
د ترکیې بهرنیو چارو وزارت هم په یوه خبرپاڼه کې افغانستان کې د نجونو ښوونځیو پر بندیدو خواشیني ښودلې او هیله یې څرګنده کړې،چې دا ښوونځي دې ژر تر ژره پرانېستل شي.
په خبرپاڼه کې راغلي،چې زده کړې د هر انسان حق دی او طالبانو دې له نویو واقیعتونو سره ځانونه عیار کړي.
د خبرپاڼې یوه برخه:«د ترکیې بهرنیو چارو وزیر له طالبانو غواړي،چې خپله ایډیالوژي نوې کړي او د وخت او افغاني ټولنې له واقعیتونو سره ځانونه عیار کړي. موږ به په سخت وخت کې د افغانانو ترڅنګ ودریږو او ملاتړ ته به یې دوام ورکړو.»
اخوا جینوا کې د ملګرو ملتونو د بشري حقونو متخخصینو له نړیوالې ټولنې او افغانستان کې د ملګرو ملتونو له فعالو استازولیو غوښتي،چې پر اسلامي امارت دې فشار راوړي،تر څو ټولو افغانانو ته د زده کړو زمینه برابره کړي.
دوی وایي، د زده کړو حق د انسانانو بنسټیز او نه ردیدونکی حق دی،چې اسلامي امارت باید ورته ژمن پاتې شي.
د ملګرو ملتونو د بشري حقونو متخخصین :« د زده کړو حق د انسانانو بنسټیز حق دی، نو له طالبانو مو غوښتنه دا ده،چې خپله پریکړه دې له سره واخلي. په ټول افغانستان کې د هر عمر لرونکو نجونو ته باید ښوونځیو ته د تګ زمینه برابره شي.»
د اسلامي امارت د پوهنې وزارت د وري میاشتې پر درېیمه نیټه خپله هغه پریکړه له سره واخیسته،چې ټولې نجونې به ښوونځیو ته پرېښودل کیږي او له دې سره یې میلیونونه هغه نجونې د ښوونځیو له دروازو راوګرځولې،چې له اووه میاشتني ځنډ وروسته ښوونځيو ته ورغلې وې.
