ګوترس وایي،سره له دې چې نوي حکومت د ټولو ښوونځیو د پرانېستل کېدو ژمنه کړې وه، خو له خپلې ژمنې پر شاه شول او په خبره یې د ښوونځیو تړل کېدل ناهيلي کوونکې او د افغانستان لپاره بده پرېکړه ده.
د ګوترس پر وینا،دا پرېکړه نه یوازې د تحصیل او زده کړو حق تر پښو لاندې کوي، بلکې د افغانستان راتلونکې ته هم خطرونه جوړوي.
نوموړي له افغان چارواکو غوښتي دي،چې ټول ښوونځي دې له ځنډ پرته د زده کوونکو پرمخ پرانیزي.
په ورته مهال د امریکا متحده ایالتو بهرنیو چارو وزیر انټوني بلېنکن د ښوونځیو په تړاو د اسلامي امارت د پرېکړې په غبرګون کې ویلي، د نوي حکومت دا کړنه به په افغانستان کې اقتصادي وده ټکنۍ کړي او دغه راز له نړۍ سره د ښو اړیکو د لرلو په تړاو به د اسلامي امارت هیلې زیانمنې کړي.
بلېکن ویلي، نوي حکومت له نړیوالو سره ژمنه کړې وه، چې بشري حقونو ته به درناوی کوي او تر څنګ به یې ټولو افغانانو ته په مساوي توګه د زده کړو حق ورکوي،، خو له دغې ژمنې تېرېدل به خطرناکې پایلې ولري.
