د افغانستان اسلامي امارت وايي، د افغان شخصیتونو راستنېدو په اړه جوړ شوي کمېسیون نن پر کار پیل وکړ.
اسلامي امارت وایي، دا کمېسیون به په بهر کې مېشتو افغان شخصیتونو سره په اړیکه کې وي او هغوی ته به ډاډ ورکړي، ترڅو هېواد ته یې د بېرته راستنېدو زمینه برابره کړي.
دغه کمېسیون،چې د اسلامي امارت کابینې یې د جوړېدو پرېکړه کړې وه، کار کوي، چې له سیاسي څېرو او نورو هغو شخصیتونو سره چې له هېواده بهر دي، خبرې وکړي او افغانستان ته د هغوی د راستنېدو لار هواره کړي.
لا مالومه نه ده،چې یاد کمېسیون تر دې دمه له هېواده بهر له څومره افغان څېرو سره اړیکې نیولي او په دې تړاو څومره پرمختګ شوی دی.
له افغان شخصیتونو سره د اړیکو د کمېسیون مشري د کانونو او پټرولیم وزارت د سرپرست شهاب الدین دلاور کوي او د اسلامي امارت یو شمېر نور جګپوړي چارواکي هم په کې غړیتوب لري.
