Skip to content
د افغانستان اسلامي امارت بهرنیو چارو وزارت سرپرست امیرخان متقي په کابل کې د ملګرو ملتونو سیاسي استازولۍ یا یوناما له مشرې دیبورا لاینزسره لېدلي او د ښځو او بشري حقونو، پراختیايي پروژو بانکي برخې،اقتصادي ودې او پرسیاسي مسایلو بحث او خبرې یې کړي دي.
د بهرنیو چارو وزارت مرستیال ویاند ضیاء احمد تکل وايي، په دغه لېدنه کې د بهرنیو چارو وزارت سرپرست له ملګرو ملتونو غوښتي دي،چې د اقتصادي او بشري مرستو ترڅنګ دې له سیاسي انزوا نه واېستلو په برخه کې دې هم له افغانانو سره مرسته وکړي.
تکل زیاتوي:«په دغه ناسته کې پر بشري مرستو، بشري حقونو، انکشافي پروژو، بانکي سکتور، اقتصادی ودې او ګڼو نورو موضوعاتو بحثونه وشول. د یوناما د ماموریت د یو کلن تمدید څخه تمه داده،چې دافغانستان لپاره مثبت نتایج ولري، له بشري مرستو وراخوا په سیاسي برخه کې هم اغیزمن ګامونه واخلي،چې دنوي حکومت پر رسمیت پیژندنه، پر شخصیتونو او اقتصادي برخو کې دندیزونو په لرې کولو سره به د افغانانو اساسي حقوق خوندي کړل شي.»
یوناما مشره دیبورا لاینز وايي، د ملګرو ملتونونو امنیت شورا په خپلې وروستۍ ناسته کې د افغانستان په تړاو مثبت ریپوټ درلوده،چې دا د افغانستان د نوي حکومت لاسته راوړنه په ډاګه کوي.
لاینز زیاتوي:« امنیت شورا په تیره غونډه کې د افغانستان په تړاو مثبت راپو درلود،چې دا کار د نوي حکومت د پرمختګ او لاسته راوړنو ښکارندوي کوي.»
د اسلامي امارت اندېښنه داده،چې په ملګرو ملتونو کې یې د استازي نه موجودیت افغانان له خپلو ټولو هغو نړیوالو حقوقو بې برخې کړې دي،چې د نړۍ نور ولسونه ترې برخمن دي.
تکل وايي:« په ملګرو ملتونو کې د افغانان د استازي نشتون پر کور دننه او بهر د افغانانو حقوقو تلف ته زمینه برابره کړې او تر پښو لاندې شوي دي.»
اسلامي امارت له یو لوري خپل حکومت لپاره له نړۍ مشروعیت غواړي او په ملګرو ملتونو کې د خپل استازي لپاره څوکۍ غواړي،خو له بل خوا بیا د نړۍ له هغو شرایطو سره مخالفت لري،چې د رسمیت پیژندنې معیار ګڼل کیږي او تازه یې د نجوونو ښوونځیو پرانیسته د نامالومو دلایلو له امله ځنډولې،چې دغه چارې پر کور دننه او بهر غبرګونونه راپارولي دي.
