اسلامي همکاریو سازمان نن اسلام اباد کې ناسته کوي 

ټاکل شوې ده، چې نن سه شنبه د « ۱۴۰۱ کال د وري پر ۲ مه»  د اسلامي همکاريو سازمان بهرنیو چاررو وزیرانو ۴۸ مه ناسته د پاکستان پلازمېنه اسلام اباد کې ترسره شي.

د اسلامي همکاریو سازمان وایي،په دې ناسته کې به د نورو مهمو موضوعاتو ترڅنګ د افغانستان په روان وضعیت هم خبرې وشي.

یاد سازمان ویلي، په افغانستان کې له سیاسي بدلونونو وروسته د اقتصادي ستونزو ډېرېدو او د ناوړه بشري وضعیت د مخنیوي لپاره خپلو هڅو ته دوام ورکوي.

د افغانستان په اړه د تېر کال ناستې جوړولو وروسته د اسلامي همکاریو سازمان په افغانستان کې خپل دفتر پرانېست او د افغانستان لپاره یې یو ځانګړی استازی وټاکه،تر څو افغانستان ته د دې سازمان د بشري مرستو رسولو په برخه کې همغږي وکړي.

د افغانستان د بهرنیو چارو وزارت وایي،دوی د اسلامي همکاریو سازمان په غونډه کې د ګډون تابیا لري او دې غونډې ته یې یو ټيټ پوړی پلاوی لېږلی دی.

په ورته مهال د پاکستان لومړي وزیر عمران خان ویلي، له څلورو لسیزو وروسته اوس  په افغانستان او سیمه کې د سولې لپاره رښتینی فرصت برابر شوی او د افغانستان بشري او اقتصادي ناورین د مخنیوي لپاره باید پر ګډه کار وشي.