Skip to content
په کابل کې د یکشنبې پر ورځ د « ۱۴۰۰ کال د کب پر ۲۹ مه» د مدني ټولنو یو شمېر استازو د یوه خبري کنفرانس پر مهال د امریکا متحده ایالتو له ولسمشر جوبایډن وغوښتل،چې د افغانستان پانګه ازاده او افغانستان له خراب اقتصادي حالته وژغوري.
مدني فعال سيف الرحمن پښتون وايي:« دغه پيسې د افغانانو پیسې دي، موږ د افغان ولس په استازولۍ باندې د مدني ټولنو په نماینده ګۍ باندې د عامو افغانانو په نماینده ګۍ باندې ټولې نړۍ او په ځانګړي ډول امریکا ته دا وایو،چې زموږ شتمنۍ مه کنګل کوئ، په داسې صورت کې چې تاسو ته دا خبره واضح شوه،چې د سپټمبر يولسمې په پېښه کې افغانان ښکېل نه ول.»
یو شمېر نور بیا وايي، په کنګل شوې شتمنۍ کې ميلونونه ډالر د افغان سوداګرو دي،چې په بندېدو سره یې سوداګرو ته ستونزې پيدا او ورسره سلګونه انکشافي پروژې پر ټپه ولاړې دي.
مدني فعال ذاهدالرحمن زاخېلوال وايي:« په میلونونو ډالر د انکشافي پروژو دي، همدا اوس افغانان ان له امریکا سره تجارت نه شي کولای. له اسیايي هېوادونو سره يې نه شي کولای.»
د کنګل شوې شتمنۍ په اړه وروسته له هغې غبرګونونه زیات شول،چې د امریکا ولسمشر وویل د افغانستان کنګل شوې پيسې به د سټمبر پېښې قربانیانو ته د غرامت په شکل ورکړي، هغه پرېکړه،چې د افغانانو په شمول ډېر نړیوال يې غیرې عادلانه بولي.
