Skip to content
نړیوال بانک د سې شنبې پر ورځ د « ۱۴۰۰ کال د کب پر ۲۴ مه» د خپلې هغې سروې وروستی راپور خپور کړ،چې پر بنسټ یې په بېلا بېلو برخو کې افغانستان کې د اسلامي امارت له واکمنی راوروسته د افغان کورنیو ژوند ته کتنه شوې ده.
یاد بانک وایي، سروې یې د ټیلیفون له لارې د افغانستان په ټولو ولایتونو کې کړې ده.
د نړیوال بانک سروې ښیي،که څه هم افغانان لا هم د ژوند محدودو خدماتو ته لاسرسی لري،خو د پیسو نه شتون له امله لا هم له ټولو خدماتي برخو بې برخې دي. د کار او دندو برخه کې د نړیوال بانک سروې دا موندنې لري.
د نړیوال بانک راپور یوه برخه:« په ښارونو او کلیوالو سیمو کې د هغو خلکو شمېر زیات شوی دی،چې د دندې په لټه کې دي.
په کلیو کې د بې روزګاری کچه لوړه،خو په ښارونو کې د ښه امنیت له امله دا کچه ټیټه ده. د حکومتي دندو کچه په ټوله کې ټیټه شوې،خو د شخصي کاروبار کچه لوړه شوې ده. په کار بوخت خلک په خپلو عوایدو کې د کمښت شکایت کوي.»
نړیوال بانک همداراز موندلې،چې په ټوله کې لا هم ښوونځیو ته د تلووړنکو زده کوونکو جنسي توپیر شته دی او د نجونو پرتله د هلکانو شمېر لوړ دی.
د دغې سروې موندنې ښيي،چې د ۲۰۱۹ زېږدیز کال پرتله د ښځینه او نارینه زده کوونکو شمېر لوړ شوی او اوس لومړنیو ښوونځیو ته ډېرې نجونې ځي.
د نړیوال بانک د راپور یوه برخه:« په ۲۰۱۹ زېږدیز کال کې د خراب امنیت له امله کمې نجونې ښوونځیو ته تللې،خو اوس دا شمېر په ښارونو کې لوړ شوی دی. په کلیو کې د ښځینه زده کوونکو شمېر کې بدلون نه دی راغلی. د هغو افغانو کورنیو په شمېر کې کمښت راغلی دی،چې نجونې یې منځنیو ښوونځیو او لیسو ته استولې.»
په سروې کې وړاندې ویل شوي دي،چې په کلیو او ښارونو کې اوس کورنۍ سالمو خوړو ته لاسرسی نه لري او د هغو کورنیو شمېر ۷۰ سلنه ته پورته شوی دی،چې کورنیو ته خواړه او نور اړین توکي نه شي چمتو کولای.
د روغتیایي برخې په تړاو ویلي شوي،چې د تېر زېږدیز کال له اکتوبر تر ډیسمبر میاشتې پورې ۹۴ سنله خلکو،چې مېرمنې هم پکې شاملې دي روغتیایي خدماتو ته لاسرسی درلود.
