افغانستان ته د کډوالو په چارو کې د ملګرو ملتونو د عالي کمېشنر فلیپو ګرانډي د سفر په درشل کې د بشري حقوقو نړیوال سازمان ښځو برخې مشرې هیدر بار وايي، بهر ته د افغانانو او په ځانګړي ډول د ښځو پر سفر بندیزونه باید لیري شي.
هیدر بار له فلیپو ګراندي غوښتي،چې د اسلامي امارت له خوا بهر ته د افغانانو او په ځانګړي ډول د ښځو پر سفر لګېدلي محدودیتونه لغوه د خپل سفر په اجنډا کې یې ونیسي.
هیدر بار زیاته کړې:« طالبان وهڅوئ،چې پر ټولو هغو کسانو چې غواړي، له افغانستانه ووځي،محدودیتونه دې ور څخه لري کړي.»
په ورته وخت کې د ښځو حقونو یو شمېر فعالانې بیا وايي، په افغانستان کي ډېری داسې مېرمنې شته دی، چې محرم نه لري او اړې دي،چې پرته له محرم ښار او بازار ته ووځي او یا هم بهر سفر وکړي.
د ښځو حقونو فعاله سحرساحل وايي:« طالبان باید دا ومني، په تېرو ۲۰ کلونو کې مو چې کومې جګړې له دوی سره کړې، داسې ښځې شته دی،چې خپل مېړونو یې له لاسه ورکړي، میندو خپل زامن له لاسه ورکړي او داسې کورنۍ هم شته دی،چې هېڅ محرم نه لري او خپله ښځې یې سرپرستې دي. کله چې دوی نه غواړي، یوه ښځه له کوره بهر له محرم پرته ووځي او یا هم سفر ونه کړي، نو دا فساد ته لا زمینه برابروي.»
د سیاسي چارو شنونکي وايي، د اسلامي امارت تعامل له نړیوالو سره مهم دی او له سفرونو د بندیزونو لیري کول به حاکم حکومت ته د نړیوالو پام زیات او د اوسني افغانستان پر وړاندې به د نړیوالو دریځ نرم کړي.
د سیاسي چارو شنونکی فرهاد اکبري وايي:« هېله مې دا ده،چې د طالبانو له لوري پر سفر لګول شوي بندیزونه لري کړي، ترڅو هرڅوک خپله ازادي ترلاسه کړي.»
