د سیاسي چارو یو شمېر شنونکي وايي، په کابل کې د اسلامي همکاریو سازمان دفتر پرانېستل کېدل، له اقتصادي او سیاسي پلوه د افغانستان پر ګټه دی او باید کار ترې واخېستل شي.
دوی وايي، د یاد سازمان له لارې به د افغانستان او اسلامي نړۍ ترمنځ اړیکې پراخې شي او د نوي حکومت په رسمیت پیژندنه کې به مرسته وکړي.
د ولسي جرګې پخوانی غړی کمال ناصر اصولي وايي:« د اسلامي هېوادونو کنفرانس د دفتر خلاصول په افغانستان کې د اقتصادي بحران د مخنیوي په برخه کې ګټور دی او له سیاسي پلوه یې ګټې دا دي،چې نوره نړۍ هم له افغانستان اړیکې ټینګې کړي.»
یاد سازمان به د افغانستان سرپرست حکومت سره په سیاسي او اقتصادي برخو کې خپل عملي کار پیل کړي.
د سیاسي چارو شنونکي وايي،یاد سازمان دې د اقتصادي کارونو ترڅنګ د افغانستان د نوي حکومت پر رسمیت پیژندنه کې مرسته وکړي.
دوی وايي، دا پرر نړیواله کچه باوري سازمان دی او که له افغانستان سره ریښتینې مرسته وکړي، ګټې به یې زیاتوي.
د سیاسي چارو شنونکی حکمت الله حکمت وايي:« د اسلامي همکاریو سازمان نه یوازې د اقتصادي ګټو په اړوند باندې، بلکې له نړیوالې ټولنې سره د اړیکې په ښه والي کې او بالاخره د رسمیت پیژندنې په برخه کې ریښتینې مرسته وکړي. زموږ افغانانو هېله داده،چې د اسلامي هېوادونو سازمان د دفتر په خلاصولو سره عملي ګامونه پیل کړي،چې هغه د اقتصاد هم د سیاست او هم په نورو برخو کې ګټور تمام شي.»
ځینې بیا په دې باور دي،چې په اوسنیو شرایطو کې د افغانستان ملي ګټې دا ایجابوي،چې د اسلامي هېوادونو د همکاریو سازمان دفتر دې په کابل کې فعال وي او افغانستان کولای شي، چې له دې لارې له نورې نړۍ سره اړیکې ټینګې کړي او سیاسي ګټه ترې واخلي.
سیاسي فعال هاتف مختاروايي:«د اسلامي هېوادونو د همکارۍ سازمان دفتر پرانېسته د افغانستان د ملي منافعو پر ګټه دی. افغانستان کولای شي،چې د او. ای. سي له لارې له ټولو اسلامي هېوادونو سره ښې اړیکې ولري او د دې دفتر پرانېسته د خلکو او نظام پر ګټه کار دی.»
د اسلامي همکاریو سازمان له هغې وروسته په کابل کې د بشري مرستو د رسولو په موخه کابل کې خپله استازولي پرانیزي،چې د ۷ میاشتو راهیسې اسلامي امارت پر ټول هېواد واکمن دی او له نړۍ سره یې د ښو اړیکو ټینګولو اعلان کړی دی.
