Skip to content
د ملګرو ملتونو د کډوالۍ ادارې د ټولنو اړتیاوو د ارزونو لړۍ پر دوام د خپلې څوارلسمې ارزونې پایلې خپرې کړې.
دغه ارزونه چې د تېر ۲۰۲۱ کال په وروستیو دوه میاشتو کې شوې، بوږنوونکي ارقام ښیي.
د دې ادارې دا پړاو ارزونه د افغانستان د ۳۴ ولایتونو په ۴۰۱ ولسوالیو کې ترسره شوې ده،چې ټولټال په کې ۸۲ زره ۸۶۰ کسان پوښتل شوي دي.
د ارزونې په سر کې د افغانستان د اتلس کلونو د پورته عمر لرونکو بې روزګاره خلکو شمېر ښودل شوی دی، چې سلنه یې ۸۳ ته رسیږي.
د کډوالۍ نړیوالې ادارې راپور یوه برخه:« له ۱۸ کلونو پورته بې رزوګاره خلک، ۱۹ میلیونه، ۹۵۰ زره ۹۸۱ کسان دي، چې د ټول نفوس ۸۳ سنله خلک کیږي. ۱۰میلیونه، ۱۰۲ زره او ۹۹۱ کسان روغتیايي مرکزونو ته نه ځي،چې د ټول نفوس ۲۱ سلنه خلک کیږي. ۲۶ میلیونه، ۷۸۲ زره او ۲۳۶ کسان د څښلو اوبو ته اړتیا لري،چې د ټول نفوس ۵۷ سلنه خلک کیږي. د هرې افغانې کورنی پور، ۴۲ زره او ۴۱۶ افغانۍ دی، چې ۴۷۱ ډالر کیږي.»
د کډوالۍ ادارې په افغانستان کې د کورونايي وضیعت په تړاو هم اندېښنه ښودلې او ټینګار یې کړی دی،چې د دې وبا د لا خپریدو مخنیوي په موخه باید په روغتونونو کې د شکمنو ناروغانو د ټیسټونو اخیستلو ظرفیت لوړ شي.
د یادې ادارې ارزونې پایلې ښيي،چې د خوړو نه خوندیتوب، کمزوري اقتصاد او بازار ته د خلکو محدود لاسرسي له امله افغانان په اوونۍ کې تر شپږو ورځو حبوبات خوري.
د کډوالۍ نړیوالې ادارې راپور یوه برخه:« ۷ زره ۹۹۳ کلیو ته په تېرو شپږ میاشتو کې بشري مرستې نه دي رسیدلي ،چې د ټولو کلیو ۶۱ سلنه کیږي. یو میلیونه، ۴۶۵ زره او ۴۷۸ کسان معیوب یا معلول دي،چې د ټول نفوس درې سلنه کیږي. دوه میلیونه ۱۳۱ زره او ۲۵۵ ماشومان ښوونځیو ته نه ځي،چې د ټولو افغان ماشومانو ۳۷ سلنه کیږي.»
د کډوالۍ نړیوالې ادارې دا څوارلسم پړاو ارزونه ښیي،چې د تېر پړاو ارزونې پرتله افغانستان کې د فقر کچه لوړه شوې، بشري مرستو ته اړتیا ډېره شوې او په وینا یې د دوی لخوا ارزول شویو یوازې ۳۸ سلنه کلیو بشري مرستې ترلاسه کړي دي.
په یاده اروزنه کې همداراز ویل شوي دي،چې نږدې ۶ میلیونه خلک پر کور د ننه بې ځایه شوي، په داسې حال کې چې بهر ته د کډوالو شمېر څه باندې څلور نیم میلیونو ته رسیږي.
