اخوا د سیاسي چارو یو شمېر شنونکي بیا پر دې باور دي، که اشرف غني هېواد ته راستون شي،نو له سیاسي پلوه به د اسلامي امارت پر ګټه وي او د امریکا پر مشرۍ نړیوال نه غواړي،چې اسلامي امارت دې سیاسي ګټې وکړي او محب یې په همدې موخه غني ته ورلیږلی،چې کابل ته یې له تګ منعه کړي.
دوی وايي، محمداشرف غني کولای شي،چې د رسمیت پیژندنې په برخه کې په منځنۍ اسیا،هند او سویلي اسیا کې د اسلامي امارت لپاره ګټورر تمام شي او په باور یې پر همدې اساس پاکستان ته دغه کار د منلو نه دی او له امریکا یې غوښتي،چې د غني د راتلو مخه ونیسي.
د سیاسي چارو شنونکی سید بلال هاشمي وايي:« دا داسې ښکاري،چې بین المللي لوبې داسې دي،چې هغوی هم نه غواړي،چې اشرف غني راشي افغانستان ته او دلته واوسیږي،ځکه په سیاسي لحاظ د اسلامي امارت په حساب کې کریدیت راځي او ماته داسې ښکاري،چې پاکستان هم له اشرف غني سره روابط ښه نه و اوس نه غواړي،چې اشرف غني راشي، افغانستان ته که چیرې راشي هغه کولای شي،چې په منځنۍ اسیا او جنوبي اسیا کې د رسمیت پیژندنې په برخه کې له اسلامي امارت سره زیات کمک وکړي. دا هغه څه دي،چې پاکستان یې په هیڅ قیمت نه غواړي او د دې امکان شته دی،چې پاکستان امریکا ته ویلي وي، چې په هرقیمت چې کیږي دغه سړی باید رانه شي،په همدې موخه حمد الله محب له امریکا نه هلته ورسیده او غني یې له راتګ منع کړ.»
خو ځینې نور بیا په دې باور دي،چې غني لاهم په افغانستان کې له امنیتي پلوه ځان خوندي نه بولي او ډاډه دی،که افغانستان لاړ هم شي،امنیت یې څوک نه شي ټینګولی .
شنونکی طارق فرهادي وايي:« تر اوسه پورې هم د اشرف د ځان ویرې دلایل هم په افغانستان کې موجود دي،که افغانستان ته هم راشي هغه پوهیږي،چې امنیت یې څوک نه شي نیولای،ځکه مختلف خلک له مختلفو ځاینو زیات قهرجن دي.»
پخوانۍ افغان دیپلوماته شکریه بارکزۍ بیا له اسلامي امارته غواړي،چې د ټولو سیاسیونو د بېرته راتګ لپاره زمینه برابره کړي،چې دغه کار د هوسا افغانستان لپاره د سیاسي اجماع د جوړېدو لپاره مهم دی.
بارکزۍ زیاته کړه:« اوسني خلک،چې اوس یې په افغانستان کې سیاسي او نظام واک یې په اختیار کې دی، دوی دومره وکړي،چې افغانستان بېرته د ټولو افغانانو ګډ کور کړي او د یوې سیاسي اجماع لپاره دا ډېره اړینه ده،چې د افغانستان ټول خلک او سیاسي جریانونه بېرته سره پر ګډه راټول شي او د هوسا افغانستان لپاره کار وکړي.»
د پخواني حکومت د ملي امنیت شورا سلاکار حمدالله محب ته نږدې سرچینې وايي،ترهغې چې پخوانی ولسمشر او محب په تړاو د سیګاراو نورو اړوندو نړیوالو ادارو د فساد د ارزونې پایلې نه وي اعلان کړي، دوی دواړه له متحده عرب اماراتو څخه بل هېواد ته د اوسېدو لپاره سفرنه شي کولای او ښايي دغه راپورونه تر یوې بلې میاشتې خپاره شي.
