Skip to content
د ملګرو ملتونو عمومي منشي انټونیو ګوتریش د مونیخ په امنیتي ناسته کې وویل،د القاعده او نورو ډلو لاسته زیاتې وسلې په لاس ورغلي او له افغانستانه د ترهګرۍ پراخېدو ګواښ موجود دی.
ګوترش وايي، ترهګر د خپل فعالیت لپاره تر ډېره هغو هېوادونو کې د ځای موندلو په لټه کې دي،چې وضعیت یې حساس وي.
هغه زیاته کړې:« په ټوله نړۍ کې امنیتي ستونزې او د ترهګرۍ ګواښونه د زیاتیدو په حال کې دي. په سوریه کې داعش له ماشومانو د سپر په توګه کار اخلي. القاعده هم د قدرت ترلاسه کولو په لټه کې په ټوله نړۍ کې هڅې پیل کړي او د افغانستان له لوري هم د ترهګرۍ ګواښونه ورځ تر بلې زیاتیږي.»
داعش وسله واله ډله چې تېرکال زیاته فعاله وه،واک ته د طالبانو رسېدو سره له فعالیت لوېدلې ده، سلګونه جنګیالي یې تسلیم شوي او اسلاميامارت ورته د یو ګواښ په سترګه نه ګوري.
اسلامي امارت بار بار د نړیوالو د اندېښنو په اړه ویلي، هیچاته اجازه نه ورکوي،چې د افغانستان خاوره د نورو پرضد وکاروي او دا د اسلامي امارت او امریکا ترمنځ د دوحې لاسلیک شوي تړون کې مهمه ژمنه ده،چې دوی پرې ولاړ دي.
اخوا د پوځي چارو یو شمېر کارپوهان بیا د ګوتریش څرګندونې له حقیقت لرې ګڼي،چې ګواکې په افغانستان کې د ترهګرۍ ګواښونه مخ په زیاتېدو دي.
د پوځي چارو کارپوه توریالی ځاځی وايي:« زما هېله له ملګرو ملتونو دا ده،چې نور دا هېواد او ولس په ارامه پرېږدي. تر نن ورځې پورې د دې هېواد او ولس په اړه پرته له دروغو هېڅ رېښتیا خبره چا ونه کړه. ملګري ملتونه کولای شي او پرې پوهېږي هم،چې ترهګرې ډلې چېرته دي. د ترهګرو ډلو ځاله او ماشینري پاکستان دی. دوی باید پر پاکستان فشار راوړي،چې دغو ترهګرو ډلو ته ځای ورنه کړي.»
د امریکا متحده ایالتو مرکزي قوماندانۍ قوماندان جنرال کېنټ فرانک مکینزي هم په افغانستان کې د داعش وسله والو د فعالیتونو په اړه اندېښنه ښوولې او په خبره یې مخ په زیاتېدو دي.
پوځي کارپوهان بیا وایي، نړیوال دې په هغو هېوادونو فشار راولي،چې له کلونو راهیسې د وسله والو ډلو تر شاه لاس لري او ملاتړ یې کوي.
د پوځي چارو کارپوه محمد رادمنش وايي:«دا ښکاره خبره ده،چې د افغانستان ګاونډي هېوادونه باید د ترهګرۍ پر وړاندې په صادقانه ډول ونډه واخلي، کنه نه یوازې ترهګري فعالیتونه په افغانستان کې بلکې په سیمه کې هم ځالې موندلی شي او هم یې فعالیتونه پراخه کېږي.»
اسلامي امارت له تیرو شپږو میاشتو راهیسې په ټول هېواد واک ترلاسه کړی او د اوس لپاره داسې کومه وسله واله ډله فعاله نه ده،چې نوی حکومت وننګوي او له دې ځایه سیمې او نړۍ ته ګواښ پیښ کړي.
