Skip to content
د افغان ښځو او بشر حقونو لپاره د امریکا متحده ایالتو ځانګړې استازې سعودي عربستان کې د اسلامي همکاریو سازمان له استازو سره په افغانستان کې د بشري وضعیت ترڅنګ په نورو مهمو موضوعاتو خبرې کړې دي.
امیري پر خپله ټویټر پاڼه لیکلي، په دې کتنه کې یې په افغانستان کې د بشري ناورین د مخنیوي لپاره د دغه سازمان پر هڅو خبرې کړې او له هغوی یې غوښتي، چې پر اسلامي امارت فشار راوړي، ترڅو د ټول شموله حکومت، بشري حقونو، د نجونو او ښځو زده کړو او ټولنیزو او سیاسي برخو ته د هغوی د راګرځولو په برخه کې پر خپلو ژمنو ودرېږي.
ورته مهال د افغان ښځو او بشر حقونو په برخه کې د امریکا ځانګړې استازې د اسلامي پراختیايي بانک له استازو سره هم کتلي دي.
امیري وایي د افغانستان لپاره د امانت صندوق په جوړولو کې د پرمختګ او د اسلامي همکاریو د غړو هېوادونو او نورو متحدينو د هڅو هرکلى کوي،چې په افغانستان کې بشري وضعيت ته د رسېدو لپاره له دغه صندوق سره مرستې وکړي.
