د کندهار ولایت د ټولګټو چارو ریاست مسوولین وايي، د دغه ولایت په بېلابېلو سیمو کې د تیرو جګړو پر مهال د ویجاړو شوو پلچکونو او پلونو د بیارغونې چارې روانې دي او په ځینو برخو کي د ویجاړو شوو پلونو او لارو رغېدو چارې بشپړې شوې دي.
د یاد ریاست مشر نعمت الله سراجي وايي،د پلچکونو تر څنګ د ارغنداب ولسوالۍ د یوه لوی پله او کندهار- هرات لويي لارې د ویجاړو شوو ځایونو او پر دغه لار د ویجاړو شوو پلچکونو کار هم روان دی.
سراجي زیاته کړه:«نږدې ۳۰۰ پلچکونه په تېرو جګړو کې ویجاړ شوي ول، په لومړي پړاو کې مو د ۱۰۳ پلچکونو د جوړولو پلان عملي کړی او راتلونکي کې به نور ویجاړ شوي پلچکونه هم ورغول شي.»
د کندهار- هرات پر لویه لار هر ورځ زرګونه موټرونه تګ راتګ کوي،چې د ویجاړو شوو ځایونو له امله موټر چلونکي د سختو ستونزو سره مخ دي.
موټر چلونکي د لارې جوړیدو ته خوشحاله دي،خو غوښتنه کوي،چې نور دي د درانه وزن موټرونو مخنیوی دي وشي.
موټر چلوونکی اسداالله وايي:« موږ ډېر خوشاله یو،چې دغه ویجاړ شوي پلچکونه او خراب شوي سړکونه بیا له سره جوړېږي، اوس به پر دغو لارو ترافيکي پېښې هم کمې شي.»
د کابل – کندهار او کندهار- هرات لویه لاره د جګړو له امله زیاته ویجاړه شوې،چې له امله په تیرو کلونو پر دغه لار زیات ټکرونو رامنځته شوي او سلګونه کسانو ژوند له لاسه ورکړی دی.
