Skip to content
په ۲۰۱۹ کال کې د د اسلامي دولت نومې ډلې یا داعش مشر ابوبکر بغدادي له وژل کېدو وروسته، ابو ابراهیم د دغې ډلې مشر وټاکل شو.
ابو ابراهیم الهاشمي القریشي،چې د خپلې ډلې ترمنځ په ګڼو نورو القابو هم یادېده،چې له تیرو څو میاشتو راهیسې د ترکیې او سوریې ګډې پولې ته څیرمه د ایدلیب ښار په اطمه سیمه کې اوسیده،چې د امریکايي ځواکونو له چاپې وړاندې یې خپل ځان او ماشومان پخپله وژلي دي.
د امریکا متحده ایالتو ولسمشر جو بایډن ومنله،چې د داعش مشر د هغوی له هوايي برید وړاندې ځان او خپله کورنۍ پخپله له منځه وړې وه.
بایډن زیاته کړه:«څرنګه،چې زموږ ځواکونه هغه ته نږدې شول، هغه یوازې د خپلې کورنۍ نه بلکې په ودانۍ کې د نورو کورنیو ژوند ته هم پام ونه کړ او د دغه ودانۍ په درېیم پوړ کې یې ځان ته چاودنه ورکړه.»
بایډن ویلي، پر ابو ابراهیم د نسل وژنې، سختو بریدونو او په عراق او سوریه کې د خلکو د غلام کولو تورونه وو،چې وروستی یې په سوریه کې د کردانو په سیمه کې پر زندان برید و،چې سلګونه کسان په کې ووژل شول.
بایډن زیاته کړه:« له ۲۰۱۹ کال وروسته،داعش ډلې پر امریکايي ځواکونو مستقیم بریدونه کړي. زموږ پر متحدینو یې بریدونه کړي او په منځني ختیځ، افریقا او اسیا کې یې ستر بریدونه طرحه کړي دي. هغوی پر نړیواله کچه په سترو بریدونو کې لاس درلود،چې وروستی یې په کرد میشته سیمه کې د سوریې او ترکیې پر پوله پر یوه زندان برید و.»
د نړیوالو ګڼو بشر حقونو بنسټونو ترڅنګ د عراق یزدیانو چې داعش ډلې پرې ګڼ مرګوني بریدونه کړي، د دغو عملیاتو او د ابو ابراهیم د وژل کیدو ملاتړ کړی دی.
د نوبل جایزې ګټوونکې، نادیه مراد،چې یو وخت له داعش سره زنداني وه، د دا ډول عملیاتو د لا زیاتیدو غوښتنه یې کړې ده.
مراد زیاتوي:«په سوریه کې د امریکا د ځانګړو ځواکونو برید ابو ابراهیم الهاشمي القریشي په نښه کړ،چې د داعش ډلې اوسنۍ مشر و او د ډېرو ظلمونو او زیاتۍ امرونه یې ورکړي دي. هغه په یزدي نسل وژنه کې هم لاس درلود. دا ډول کارونه باید نور هم ترسره شي او هغوی چې ترهګري خپروي،باید له منځه ولاړ شي.»
ابو ابراهیم چې په حاجي عبدالله مشهور و او پلویانو یې ورته د پرورفیسور نوم هم ورکړی و،په ۲۰۰۳ زېږدیز کال کې یې په زندان کې له ابوبکر البغدادي سره ملتیا پیل کړې وه. د داعش ډلې مخکینی مشر ابو بکر البغدادي،هم په ۲۰۱۹ کال کې په ایدلیب ښار کې وروسته له هغې ځان ته چاودنه ورکړه،چې امریکايي ځواکونو یې د نیولو عملیات پيل کړل.
د داعش ډلې په تړاو څیړوونکي وايي،داعش ډله تر اوسه پورې یو ګواښ دی او ځواکونه به یې خامخا د یوه بل مشر تر واک لاندې خپل فعالیتونه له سره پیل کوي.
