پاولز: اسلامي امارت اړ دی د ښځو او لږکیو حقونو ته درناوی وکړي 

د افغانستان لپاره د اروپايي ټولنې  ځانګړی استازی ارنولټ پاولز له شمشاد ټلوېزیون سره د ځانګړې مرکې پر مهال وویل،نړیوالې ټولنې د یوه غړي هېواد په توګه اسلامي  امارت اړ دی،چې د ښځو او لږکیو حقونو ته درناوی وکړي.

پاولز وايي،افغانستان په کومه بله سیاره کې نه دی  او اړ دی،چې له  نړیوالې ټولنې سره همغږي ولري.

پاولز زیاته کړه:« افغانستان د اسلامي کنفرانس غړی هېواد دی او په ټولو اسلامي هېوادونو کې ښځې کار کوي. افغانسان یو ټاپو او په بله سیاره کې پروت هېواد نه دی.دا د نړېړالې ټولنې یو غړی دی. دلته اړتیا ده،چې د ښځو غږ باید واورول شي، دوی خویندې دي، میرمنې دي او میندې دي،نو د دې خلکو باید درناوی وشي.»

له بل لوري اروپايي پارلمان بیا د جنورۍ په لومړۍ او دویمه نیټه د ښځو د ورځې په نوم غونډه جوړه وي،چې اصلي اجنډا یې د افغان ښځو پر وضعیت خبرې دی.

ټاکل شوې ده،چې دې غونډې ته د افغانستان د ښځو چارو مخکېنۍ وزیره، د کډوالو لپاره د ملګرو ملتونو عالي کمېشنرۍ دفتر ځانګړې استازې، د اروپايي ټولنې کمېسیون مشره او د ملګرو ملتونو عمومي منشي ځانګړې استازې هم ګډون او خبرې وکړي.

 د افغانستان اسلامي امارت مرستیال ویاند بلال  کریمي بیا وايي، د ښځو له ټولو مشروع حقونو ملاتړ کوي او پر وینا یې  د زدکړو، کار او نورو برخو کې د ستونزو پر حل کار کوي.

کریمي  زیاته کړه:« اسلامي امارت د ښځو ټولو مشروع حقونو ملاتړ کوي  او په ټولو برخو کې هڅې روانې دي،چې هغه مسایل چې د تخنیکی او اقتصادي ستونزو له امله پاتې وي حل کړي. اسلامي امارت د ښځو کار، زدکړو او نورو برخوکې د ستونزو د حل لپاره کار کوي.»

د افغان ښځو د حقونوپه اړه د نړیوالې ټولنې او اسلامي امارت ترمنځ روانو ناندریو ته اوسه قانع کوونکی  حل نه دی موندل شوی.

 د ملګرو ملتونو سرمنشي هم پر اسلامي امارت غږ کړی دی،چې د نړیوالې ټولنې د یوهغړي هېواد په توګه دې د ښځو حقونه خوندي کړي.

اسلامي امارت  بیا وايي، د ښځو له وجود  انکار ناشونی دی،دوی پوهیږي،چې د  افغان ښځو لپاره د کار بستر  څنګه  او په څه ډول مناسب دی.