Skip to content
له تیرو پنځه میاشتو راهیسې په هېواد کې د بهرنیو اسعارو پر وړاندې د افغانیو ارزښت راټیټ شوی او افغانۍ بېرته خپل ثبات نه ی ترلاسه کړی،خو د افغانستان بانک وايي،د نړیوالو بشردوستانه مرستې کولای شي، دافغانۍ ارزښت لوړ کړي.
د یاد بانک ویاند صابر مومند وايي، کومې بشري مرستې چې افغانستان ته راځي،هغه ډالر بېرته بازار ته عرضه کېږي او دا به د افغانۍ په ارزښت خپل اغیز ولري.
مومند زیاته کړه:« کومي بشردوستانه مرستي،چي افغانستان ته راځي،د خصوصي بانک له لاري لګول کېږي،د افغانانیو ثبات باندي مثبته اغیز لري ځکه دغه ډالر بیرته بازار ته عرضه کیږي افغانیو لپاره مثبته تمامیږي.»
مومند وايي،د افغانستان خصوصي بانکونه فعاله دي او هڅې روانې دي،چې د بانکونو سیستم بېرته عادي حالت ته را وګرځوي.
هغه زیاته کړه:«د افغانستان بانک رهبرۍ د وروستۍ پریکړې پر اساس د افغانستان بانکي سیستم فعاله دی. بېلابېل ګامونه اخېستل شوي دي،هغه کسان،چي هر څومره پیسې اچوي،په هغه اندازه بېرته پیسې اېستلی شي.»
د افغانستان بانک وايي،په ټول هېواد کي اې ټي ایم ماشینونه فعاله شوي او خلک کولای شي، ورڅخه ګټه پورته کړي،خو ډېری کابل ښاریان نیوکه لري،چې په یوځای کې هم د صرافۍ اتومات ماشینونه نه دي فعال شوي او د پیسو ترلاسه کولو لپاره ساعتونه انتظار وباسي.
