په سوېل کې د پکیتا احمد خېلو ولسوالۍ یو شمېر اوسېدونکي ايي، د نرۍ برښنا بند سروې د تیر حکومت پر مهال ترسره شوې او اسلامي امارت دې پرې راتلونکی کال کار پیل کړي.
د احمدخېلو ولسوالۍ یو تن اوسېدونکی وايي:« موږ ته نه پر کاریزونو کار شوی دی او نه هم د بندونو پر جوړولو. د نرۍ برښنا بند باندې هم کار نه دی شوی. زموږ هېله ده،چې دا جوړ شي.»
تیر حکومت د نرۍ برښنا بند لپاره ۲۰ میلیونه ډالر ځانګړي کړي و او د مالوماتو له مخې چې لومړنۍ سروې یې هم ترسره شوې.
د احمدخېلو ولسوالۍ اوسېدونکي میرزا علي وايي:« د دغه بند سروې تیر حکومت کړې وه،خو بیا یې کار مالوم نه شو،چې کوم ځای ته ورسید.له اسلامي امارته غواړو،چې دغه موضوع وڅاري.»
خو د پکتیا سیندیزې فرعي حوزې امر عبدالکریم بیا وايي،اسلامي امارت پکتیا کې راتلونکی کال پر هغو بندونو او چیک ډیمو بیا ځلې کار پیل کوي،چې چارې یې ځنډیدلي او پر هغو بندونو هم کار کوي،چې لومړنۍ چارې ترسره شوي دي.
عبدالکریم زیاتوي:«اسلامي امارت د بندونو او چیک ډیمونو جوړولو لپاره پلان لري د بندونو او چیک ډیمونو جوړیدو ځنډیدلې چارې به پیلیږي او تر څنګ یې پر هغه بندونو به هم کار کیږي،چې لومړنۍ چارې یې ترسره شوي دي.»
