ډوجارېک زیاتوي:« که څه هم راتلونکو ورځو کې د نور اورښت او هوا سړېدو اټکل دی، خو زموږ بشري ادارې په چټکۍ سره کار کوي او هغه ژمنتیا پر ځای کوي،چې د خپلو فعالیتونو د چټکولو برخه کې یې کړې وه. تېر ډیسمبر میاشت کې زموږ همکارانو په افغانستان کې اووه میلیونه خلکو ته خوراکي،غیر خوراکي، نغدې پیسې او د ژمي توکي رسولي دي او دا لړی لا هم په ډېرو برخو کې روانه ده.»
اسلامي امارت د نړیوالې ټولنې او په ځانګړي ډول د ملګرو ملتونو له خوا د شویو مرستو مننه کړې او ټینګار یې کړی دی، چې د افغانستان خلک دا ډول مرستو ته لا ډېره اړتیا لري.
په همدې حال کې اسلامي امارت له ملګرو ملتونو غوښتي،چې د بشري مرستو د لا اغیزمنتیا لپاره دې دغه مرستې د دوی په همغږۍ پر اړمنو کورنیو وویشي.
د اسلامي امارت د ویاند مرستیال انعام الله سمنګانی وايي:« موږ د ملګرو ملتونو له مرستو مننه کوو،خو له دوی غواړو،چې باید دا مرستې له اسلامي امارت سره په همغږی وویشل شي،تر څو لا ډېر موثریت او اغیزمنتیا ولري. ملګري ملتونه باید په دې برخه کې عملي ګامونه واخلي.»
ملګري ملتونه او نړیواله ټولنه داسې مهال له افغانستان سره د بشري مرستو لړی جاري ساتلې ده،چې دلته واکمن حکومت لا هم په رسمیت نه دی پیژندل شوی او د نړیوالو له خوا وضع شویو بندیزونو د افغانانو ورځنی ژوند سخت کړی دی.
