د افغانستان د بهرنیو چارو وزارت سیاسي مرستیال شیر محمد عباس ستانکزي پکتیا کې یوې ناستې د وینا پر مهال وویل، اسلامي امارت د رسمیت پیژندلو لپاره ټول شرایط پوره کړي او هېله لري،چې هېوادونه به یې پر رسمیت وپیژني.
ستانکزي د بهرنیو ځواکونو نه موجودیت، ډاډمن امنیت او د قانون تطبیق او پر ټولو پولو کنټرول د رسمیت پیژندلو عمده شرایط بولي.
ستانکزي زیاته کړه:«د رسمیت پیژندنې ټول شرایط پوره شوي،هدف دا دی،چې افغانستان ازاد دی،بهرني ځواکونه نه شته دی، امن ټینک دی اسلامي نظام حاکم دی او ټول سرحدونه کنټرول دي.»
عباس ستانکزی همدا راز وایي، له امریکا او اروپایي هېوادونو سره لا بحثونه نه دي وروستي شوي او له څو میاشتې راهیسې ورسره خبرې روانې دي.
ستانکزی زیاتوي:« موږ له امریکا او ناټو سره ځینې ستونزې لرو، تاسو به خبر یاست،چې له څو میاشتو راهیسې ورسره موږ په خبرو بوخت یو او موږ هېله من یو،چې په نږدې راتلونکي کې به د رسمیت پیژندلو لړۍ پیل شي.»
د بهرنیو چارو وزارت سیاسي مرستیال وایي، له پاکستان سره د ډیورنډ فرضي کرښې او ازغن تار په اړه هېڅ ډول خبرې نه دي شوي او په دې اړه حکومتونه خبرې نه شي کولی او دا صلاحیت یوازې له ملت سره دی.
ستانکزی وايي:« د ډیورنډ موضوع دا د ټول هېواد موضوع ده،نه د حکومت. دا به ملت ته سپارو او اسلامي امارت له پاکستاني لوري سره په دې اړه هېڅ ډول خبرې نه دي کړي.»
اخوا د پاکستان بهرنیو چارو وزارت ویلي،د اغزن تار د لګولو پر وړاندې یو شمیر سیمو کې رامنځته شوې ستونزې به له اسلامي امارت سره له دپلوماتیکو لارو هوارې کړي.
