د سلام افغانستان شبکې غړی عبدالبصیر حقجو وایي:« اسلامي امارت له رهبرۍ احترمانه هېله کوو،چې پر وخت مالوماتو ته د لاسرسي برخه کې ستونزې حل کړي او رسنیو ته باوري سرچینې برابرې کړي.»
ناسته کې د اسلامي امارت مسوولینو د رسنیو استازو ته ډاډ ورکړ،چې د رهبري پر کچه د رسنیو ملاتړ کوي او هېڅوک به خپل سریو ته نه پرېږدي.
دوی وایي،رسنۍ دې د اسلامي او ملي ګټو پر اساس خپل نشرات برابر کړي او هېچا ته دې اجازه نه ورکوي،چې عامه ذهنیت خراب کړي.
د کورنیو چارو وزارت د ستراتیژیکو مطالعاتو د اړیکو مسوول عبدالواحد وايي:« اسلامي امارت له تاسې دا نه غواړي چې زموږ ویاندویان شئ، اسلامي امارت تاسو ته د امنیت ډاډ درکوي، لیکن تاسې ته دا وایي چې تاسې د دې ملت حقه حقوقو غږ دنیاوالو ته ورسوئ او د منفي کړنو نه تېر شئ.»
د اقتصاد وزارت بیا شته د بیان ازادي په سیمه کې بې سارې وبلله او زیاته کړه،چې ځینې هېوادونه هڅه کوي،د رسنیو له لارې خپلو اهداف پلې کړي،چې باید رسنۍ ترې ډډه وکړي.
دوی وایي، رسنۍ دې د شته نظام د پیاوړتیا او ملي یووالي لپاره کار وکړي او د ملاتړ ډاډ یې ورکړ.
د اقتصاد وزارت مرستیال عبداللطیف نظري وايي:« نوې سلطه په دې مفهوم ده،چې یو ځواک یو هېواد نه اشغال کوي، بلکې عمومي ذهنیت تر اشغال لاندې راولي او دا چاره تر ډېره د رسنیو له لارې ترسره کوي.»
د لومړي وزیر د عامه اړیکو مسوول جمال ناصر فرهمند وايي:« منو،چې ستونزې شته، خو جدي ژمنه شته دی،چې د رسنیو، خبریالانو او مدني فعالانو له حقوقو ساتنه وشي او دا ژمنه موږ پر ګډه مخکې وړو.»
د ولایتي رسنیو مسؤلین وایي، اسلامي امارت دې د ولایتونو پر کچه د رسنیو د استازو او د اسلامي امارت د مسوولینو تر منځ ګډه کمېټه جوړه کړي،چې ترمنځ یې همغږي زیاته او شته ستونزو ته رسېدنه وشي.
دغه ناسته داسې مهال جوړېږي،چې په تېرو شپږو میاشتو کې یو شمېر چاپي،غږیزو او تصویري رسنیو د اقتصادي ستونزو له کبله خپل فعالیت درولی او ګڼو خبریالانو دندې له لاسه ورکړي دي.
