د کندهار ځايي چارواکي وايي، دغه ولایت کې یې د فقر کمولو لپاره داسي يوه اداره جوړه کړي، چې ددغه ولايت له سوالګرو او زياتو بېوزلو کورنيو سره دوامداري مرستي کوي.
د يادي اداری مشر محمد عيسي کامل وايي، د ولايتي اداري په هڅو د جوړ شوي خيريه بنسټ پر مټ توانېدلي،چې ۳۵۰۰ سوالګرو او بېوزلو کورنيو سره د ۵۰ میلیونه افغانيو په ارزښت د خوراکي توکو او نقدي پېسو مرسته وکړي.
کامل زیاته کړه:« موږ ښار کې د بېوزلو او په ځانګړې توګه د هغو کورنیو لپاره د مرستې ورکولو پروګرامونه پیل کړي،چې ښار کې سوال کوي، له دوی سره د نغدو پیسو او خوراکي توکو مرستې شوي دي.»
خو کندهار کې يو شمېر بېوزله کورنۍ وایي،چې تر اوسه دغه مرستي دوی ته نه دي رسېدلي او د ژمي موسم ورباندې سخت تېريږي.
کندهار کې د يوې بېوزلي کورنۍ سرپرسته انارګله وايي:«زه د ژړۍ ولسوالۍ یمه، کور مې ونړېد، جګړه وه، ښار ته راغلې یمه. اوس د خپلې لور په کور کې اوسېږم، د یتیمانو روزنه او پالنه هم راپرغاړې ده.»
وروستيو جګړې او د اقتصادي سرچېنو کموالی د دې لامل شوی، چې د کندهار ولايت صنعتي پارک سقوط او نور فعالتونه کم شي،چې له امله يې دغه ولايت کې د بېکارۍ کچه هم لوړېدونکي او اوسېدونکي يې د لوږي له خطر سره مخکېدونکي دي.
