د افغانستان بهرنیو چارو وزارت سیاسي مرستیال شېر محمد عباس ستانکزي د شمال زون په الفتح قول اردو کې پوځي منسوبينو ته په خپله وينا کې وويل، د اسلامي امارت ځواکونه به هغوی ته سخت ځواب ورکړي،چې د افغانستان پر پولو د يرغل نيت ولري.
ستانکزی زیاتوي:« زموږ سرتېري په سنګرونو او قول اردوګانو کې حاضر دي، که هر څوک زموږ سرحداتو ته په بد نظر او يا هم د يرغل په نظر ګوري،نو همدا سرتېرري به يې سترګې وباسي، شل کاله مو قرباني ورکړه او د دې هېواد د ساتلو لپاره شل کاله نوره هم قربانۍ ته چمتو یو.»
د بهرنيو چارو وزارت سياسي مرستيال په افغانستان کې جګړه ختمه شوې وبلله او پر خپلو سياسي مخالفينو يې يو ځل بيا غږ وکړ،چې هېواد ته راشي او د هېواد په ابادۍ کې ونډه واخلي.
ستانکزی وايي:« که موږ غواړو،چې وروسته له دې څوک زموږ پر حريم تجاوز ونه کړي، زموږ د کور دروازې په نيمه شپه کې ماتې نه کړي، زموږ پر فاميل او ادولادونو چاپې ونه وهي او موږ يو سرلوړی ملت واوسو نو په کار ده،چې موږ او تاسې ټول يو بل ته لاسونه سره ورکړو او متحدانه عمل وکړو.»
ستانکزي په خپلو خبرو کې وويل، اسلامي امارت لا هم امريکا سره د يو لړ مسايلو په تړاو په مذاکراتو بوخت دی؛خو افغانانو ته يې ډاډ ورکړ،چې د ملي ګټو، د جهاد ارمانونو او اسلامي نظام پر سر به هېڅ ډول معامله ونه شي.
هغه زیاته کړه:« موږ اوس هغوی (امريکايانو) سره په تماس کې يو. هڅه کوو،داسې يوه چاره پيدا کړو،چې نه له خپلو ملي ګټو،د جهاد ارمانونو او شرعي نظام څخه د يو وېښته په اندازه پر شا شو او هم له دنيا سره ښې اړيکې ولرو.»
د ۲۰۹ الفتح قول اردو قوماندان مولوي عطاالله عمري وايي:« جنګ تخم کري، حاصل او نتيجه يې سياست راټولوي. موږ مجاهدينو جهاد وکړ او په پايله کې ښې پایلې ته ورسېدو.»
په دغه غونډه کې ويناوالو وویل، له څلور لسيزو وروسته افغانستان کې جګړه ختمه شوې او اوس په کار ده،ترڅو افغانان د شته اقتصادي ستونزو د حل لپاره يو بل ته لاسونه ورکړي.
