د زابل ولایت د عامې روغتیا ریاست مسوولین وايي، لسګونه عرادې صفر کیلو متر هونډا موټر سایکلونه د ادا موسسې له لورې د زابل ولایت د عامې روغتیا ریاست په چوکاټ کې هغو واکسیناتورانو ته په واک کې ورکړل شول، چې لري پرتو سيمو ته به یې د امکاناتو د نه موجودیت له امله واکسینونه نه شوای رسولای.
د یاد ریاست مشر مولوي ګل محمد احمد وايي،د دغو موټر سایکلونو پر مټ به د پولیو واکسیناتوران وکولای شي،چې لري پرتو سيمو کې تر هر کوره د پولیو واکسین ورسوي.
احمد زیاته کړه:«خوشبختانه په دې اړه ادا موسسې زموږ غوښتنه ومنله. په دې سره به اوس هغه ستونزه حل شي،چې لري سيمو ته به زموږ د نه رسېدنې له ګڼ ماشومان له واکسینونو پاتې ول.»
په همدې حال کې د ادا موسسې د روغتیايي برخې مسوول ډاکټر صالح محمد وايي،دغه ګام یې د عامې روغتیا ریاست په غوښتنه پورته کړی،چې له مخې به یې هغو سيمو ته هم واکسین ورسېږي،چې وړاندې به د نه امکاناتو له امله د واکسین له کمپاینونو پاتې ول.
صالح محمد زیاته کړه:« موږ دغه ګام وروسته له هغې پورته کړ،چې کله د عامې روغتیا مسوولینو په دې برخه کې له موږ د مرستې غوښتنه وکړه. موږ هېله لرو،چې له یادو موټرسایکلونو به د ستونزې د حل په برخه کې ښه ګټه واخېستل شي.»
اخوا یو شمېر هغه واکسیناتوران،چې یاد موټر سایکلونه یې تر لاسه کړي،خوښ دي او وايي، په دې سره به یې لري سيمو ته د واکسین د نه رسېدو ستونزې حل شي.
یو واکسیناتور وايي:« موږ ډېر خوښ یو،په دې سره به زموږ چارې چټکې شي. موږ به له دې موټر سایکلونو د ښې ګټې اخېستنې په موخه ښه ساتنه وکړو.»
