کرزي زیاته کړې:« دا چې ګواکې داعش ډله په افغانستان کې فعالیت لري او له افغانستان څخه پاکستان ګواښي د افغانستان خلاف ښکاره تبلیغ دی. واقعیت کې موضوع برعکس ده او د داعش ګواښ له پیله له پاکستانه افغانستان ته متوجه دی.»
د اسلامي همکاریو سازمان ناسته کې د پاکستان لومړي وزیر عمران خان ویلي، که افغانستان کې یو پیاوړی حکومت او ثبات نه وي، داعش ډله سیمې او ان امریکا ته ګواښ پېښولی شي.
د پاکستان لومړی وزیر عمران خان ویلي:« داعش وار له مخه د دواړو هېوادونو ترمنځ پر ډیورنډ فرضي کرښه پاکستان کې بریدونه کړي دي. هره ټولنه د بشري حقونو په اړه خپل نظر لري او کله چې افغانستان کې د بشري حقونو یا د ښځو د حقونو په اړه خبره کېږي، باید د پښتنو د کلتور په نظر کې نیولو سره دې موضوع ته وکتل شي.»
افغانان وایي،اسلامي امارت دې د افغانستان په اړه د پاکستان د لومړي وزیر عمران خان د بدو تبلیغاتو مخنیوی وکړي.
افغان ولس باوري دی،چې پاکستان له پخوا د افغانستان په تړاو ښه ذهنیت نه لري او تل هڅه کوي،چې نړیوالو ته یې د ترهګرۍ مرکز په توګه وروپېژني.
شنونکی نازک میر زیارمل وايي:« پخواني ولسمشر چې کوم دریځ وښود،هغه یوازې د حامد کرزي دریځ نه دی، بلکې هغه د ټولو افغانانو دریځ دی. پاکستان همیشه باید د خپل هېواد په ستونزو او مشکلاتو وغږېږي،نه د افغانستان پر استازیتوب.»
شنونکی محمد نبي افغان وایي:« اسلامي امارت باید خپل رسمي دریځ ولري. هلته په دې کنفرانس کې یې باید ورته ویلي ول، چې نه، موږ دا خلک نه یوو.»
ځېنې نور بیا وایي، عمران خان په خپلو خبرو نه پوهېږي،چې څه وایي او تل یې د افغانستان په تړاو بې اساسه او بې بنسټه خبرې کړي دي.
د افغانانو په خبره،افغانستان یو خپلواک او ازاد هېواد دی،چې له خپلو ارزښتونو ساتنه کولی شي او افغانان د خپل هېواد استازیتوب کولی شي.
دوی وایي،د عمران خان خبرې د نړیوالو قوانینو او ګاونډیتوب له اصولو خلاف عمل دی او هېڅ پاکستانی حق نه لري،چې د افغانستان په کورنیو چارو کې لاسوهنه وکړي.
شنونکی هاتف مختار وايي:« د عمران خان داسې اظهار نظر او څرګندونې د نړیوالو قوانینو او د ګاونډیتوب پر خلاف دي. اسلامي امارت د افغانستان په استازیتوب خبرې کولی شي او هېڅ پاکستانی حق نه لري،چې زموږ په چارو کې لاسوهنه وکړي.»
په ټولنیزو رسنیو کې هم نظریات شریک شوي،چې د عمران خان خبرې یې د افغانستان د ملي ګټو خلاف او افغانانو ته سپکاوی بللي دي.
تر دې وړاندې هم د پاکستان لومړي وزیر عمران خان ورته څرګندونې کړې وې،چې د اسلامي امارت له غبرګون سره مخ شو او د اسلامي امارت ویاند ذبیح الله مجاهد ترې غوښتنه وکړه،چې د خپل هېواد غم دې وخوري او افغانستان خپل کسان لري،چې استازیتوب یې وکړي.
