د اقتصادي چارو پوهان وايي، د افغانستان بانکي نظام د سقوط مخنیوي لپاره د ملګرو ملتونو مرستې د لنډمهال لپاره ستونزه حل کولی شي،خو د دایمي حل لار نه ده.
دوی وايي، ملګري ملتونه او نړیوال دې د افغانستان مالي او بانکي نظام ژغورلو لپاره کنګل شوې پانګه ازاده کړي.
اقتصاد پوه یونس ځډران وايي:« ملګرو ملتونو کومه پریکړه چي کړې، دا نه شي کولای د افغانستان خصوصي بانکونه د سقوط له ګواښه وژغوري،مهم د افغانستان د کنګل شویو پیسو خوشي کیدل دي.»
ځیني نور بیا په امریکا او متحدینو یې نیوکه کوي،چي د افغانستان له اقتصاد سره سیاسي چلن کوي او دا سیاسي چلن د دې لامل شوی،چي د افغانستان بانکونه د سقوط له ګواښ سره مخ شي.
اقتصاد پوه سخي پیمان وايي:« که نړیوال د افغانستان له بانکونوسره په غیري مستقیم ډول کمک کوي،دا نشي کولای بانکونه له سقوطه وژغوري،ځکه د افغانستان له اقتصادي سره سیاسي معامله کېږي.»
یو شمیر نور بیا وايي، نړیوال د افغانستان بانکي نظام سقوط مخنیوي لپاره نورې لارې چارې ولټوي او په شل میلیوني مرستو دغه کړکیچ نه شي حل کېدای.
د سوداګرۍ خونې مدیره هیات غړی نصیر احمد عرب وايي:« کومي پیسې چي د افغانستان له بانکونو سره مرسته کېږي،دا نه شي کولای،چي د افغانستان د هغو پیسو ځواب ووايي چي دا مهال د خلکو په بانکونو کي دي.»
ملګرو ملتونو پریکړه کړې، چي د د راتلونکي کال ترمارچ میاشتې پورې هره اوونۍ شل میلونه ډالر د افغانستان نړیوال بانک سره مرسته وکړي،ترڅو د افغانستان خصوصي بانکونه د سقوط له ګواښ څخه وژغورل شي.
