حذیفه وایي،د مشرانو په سپارښتنه یې د خیر کوټ ولسوالۍ کانک غره لوړه څوکه کې په هغه خونه کې شل کاله ژوند کړی،چې ډېری وخت به نږدې ملګري هم د هوایي بریدونو له وېرې لیدلو ته نه ورتلل.
نوموړی وایي،له دغه ځایه به یې پکتیکا کې د اسلامي امارت د امنیتي او نورو مسوولینو مخابراتي اړیکې تنظیم کولې.
حذیفه زیاته کړه:« ما شل کاله دلته مبارزه وکړه. د پکتیکا د مالوماتو لپاره او د مجاهدینو د وصل کیدو لپاره، ما ټول ژوند دغه یوازنی کوټه کې تېر کړی دی. له همدې ځایه مې د ټول ولایت مجاهدین د مخابرې له لارې سره وصل کول.»
له بازار، کور او کلي لېرې د غره دغه لوړه څوکه کې ۲۰ کاله ژوند اسانه خبره نه ده.
حذیفه وایي، د هوایي بریدونو له وېرې به ډېری وخت نږدې ملګري هم لېدلو ته نه ورتلل، خو هوډ یې کړی و،چې تر اخره به همدلته پاتې کېږي.
هغه زیاتوي:« خپل ملګري به هم دلته نه راتلل، ډېری وخت به یې راته ویل،چې ستاسو ځایه ډیر د تعقیب ځای دی او هره ورځ الوتکې ګرځي او ښایي برید وکړي ، دې ځای ته نږدې بازار کلی او ان هیڅ ابادي نشته.»
د حذیفه یو ملګری وایي:« ده به ډی لیرې لیرې سفر پر موټر سایکل کول حتا مجاهدینو ته به یې اکمالات کول بیخي ډیر تکلیفونه یې ګاللي چې مونږ به لیدل زمونږ د وس خبره نه وه ورته حیران وو.»
د حذیفه یو بل ملګری بیا داسې وايي:« کلک سړی دی،ډېر تکلیف یې ګاللی دی. موږ هلته یوه ورځ هم نشوه تیرولی او ده هلته شل کاله تېر کړل،داسې یوه ځای کې چې له کور کلي او بازاره لیرې وو.»
بلال حذیفه اوس د پکتیکا د اطلاعاتو او کولتور رئیس دی او وایي،د غره لوړه څوکه کې د تیر ۲۰ کلن ژوند په یوازنۍ جونګړه پسې خفه دی.
