په کابل کې د ملګرو ملتونو دفتر د بشري حقونو نړیوالې ورځې په اړه خبرپاڼه خپره کړې ده.
په خبرپاڼه کې راغلي، په وروستیو میاشتو کې د افغان امنیتي ځواکونو د پخوانیو غړو، حکومتي کارکوونکو، لاریون کوونکو، درسنيو د کارکوونکو، لږکيو او د بشري حقونو د مدافعینو د وژل کېدو، د هغوی پر وړاندې د تاوتريخوالي او جبري ورکېدو د معتبرو راپورونو په اړه ژوره اندېښنه لري.
یوناما له طالبانو غوښتنه کړې چې د دغو راپورونو په تړاو څېړنې وکړي او پایلې یې له خلکو سره شریکې کړي.
په کابل کې د ملګرو ملتونو دفتر یوناما غوښتنه کوي: «جرمونو د ترسره کېدو د مخنيوي لپاره بايد طالبان د ټولو ممکنه اقداماتو په ترسره کولو سره د ټولو افغانانو د حقونو د ساتنې لپاره ژمنتيا وښيي.»
د سولې او سیاسي چارو په برخو کې د ملګرو ملتونو د سرمنشي مرستیاله چې په درې ورځني سفر کابل ته راغلې وه، وایي چې د طالبانو له مشرانو، د ښځو حقونو فعالانو، مدني ټولنو او دیپلوماتانو سره یې لېدلي او د پنجشبې په ورځ بېرته تللې ده.
روزمیري ډيکارلو هم د مرستو پر دوام ټنیګار کړی، خو غوښتنې یې هم درلودې.
د م.م سرمنشي مرستیاله روزمیري ډيکارلو وايي: «د افغانستان ښځې او نجونې غواړي ښوونځي ته لاړې شي، کار وکړي او له تبعیض پرته په عامه ژوند کې برخه واخلي. په دې برخه کې شوي پرمختګونه باید له منځه ولاړ نه شي.»
