د فیصل کورنۍ ادعا کوي چې طالبانو تېره ورځ د کابل د دوهمې حوزې په مربوطاتو کې فیصل وژلی.
الهام مومند شمشاد ته ویلي، خورین فیصل او ګڼ دوستان یې د ده د نامزادۍ مراسمو کې د کډون لپاره تللي و، چې په بېرته راګرځېدو پر مهال، د دوی موټرې د طالبانو په یوه چیک پواینټ درول شوې دي.
مومند وایي، د دوی موټر تېر شو، خو په هغه موټر طالبانو ډزې وکړې، چې فیصل پکې ناست و.
د وژل شوي فیصل کورنۍ له طالبانو د عدالت غوښتنه کوي.
شمشاد ته یوي سرچیني بیا ویلي چې د دې پېښې وروسته دوه تنه نیول شوي او څېړنې ترې رواني دي.
د کورنیو چارو وزارت ویاند قاري سعید خوستی بیا وايي چې تېره شپه د کابل ښار دويمې حوزې اړوند قوای مرکز سیمه کې د فیصل په نوم ځوان د مجاهدينو له لوري ټپي شوی، چې وروسته يې په روغتون کې ساه ورکړه.
خوستی زياتوي چې پېښه قصدي نه، بلکې د تلاشۍ ته د نه درېدو او سوء تفاهم له امله رامنځ ته شوې.
د خوستي په خبره، د پېښې په تړاو دوه تنه مجاهدین نیول شوي او دوسيې يې محکمې ته سپارل شوي.
