Skip to content
په شمال بلخ ولایت مرکز مزارشریف ښار د ښوونځيو یو شمېر ښوونکي وايي، له تېرو درې نيمو مياشتو راپدېخوا مو تنخواوې نه دي ترلاسه کړي او له همدې امله له ګڼو اقتصادي ستونزو سره مخ یو.
دوی له حکومته غواړي،چې د معاشونو د ورکړې برخه کې دې خپلې ژمنې عملي کړي.
مزارشریف کې د ابو مسلم ښوونځي مدیرر سيد نقيب الله وايي:« ښوونکي چې د دې ټولنې تر ټولو بېوزله قشر دی او ت تنخواوې يې هم له تېرو څو مياشتو را پدېخوا نه دي اجرا شوي، تاسې په خدای باور وکړئ، چې له سختو ستونزو سره مخ دي. ځنې ښوونکي شته دی،چې د خپلو اولادونو او ملکيتونو خرڅلاو ته اړ شوي دي، يوه بېلګه يې زه خپله يم.»
د مزارشریف ښار کې د استقلال ښوونځي مدیر محمد نعیم وايي:« له اسد مياشتې وروسته ښوونکو خپلې تنخواوې نه دي تر لاسه کړي. تاسې پوهېږئ،چې د ښوونکو ژوند په تنخوا پورې تړلی دی. ۹۰ سلنه ښوونکي له فقر سره مخ دي او تنخواو ته په تمه دي.»
په ورته مهال مزارشريف ښار کې يوه سوداګريز شرکت پر لسو زرو ښوونکو د خوارکي توکو د مرستې لړۍ پيل کړه.
په دغو مرستو کې پنځوس کيلو اوړه او پنځه کيلو غوړي شامل دي،چې د هرې کمکي کڅوړې ارزښت يې ۳ زره افغانۍ ښودل شوی.
د مرسته کوونکي شرکت استازی مجتبی عثماني وايي:« موږ تصمیم ونیوه،چې په اوسنيو بحراني شرايطو کې د بلخ ولايت له ښوونکو او معارف کارمندانو سره مرسته وکړو، د مرستې په دې لړۍ کې به لس زره ښوونکي تر پوښښ لاندې ونيول شي،چې هر يوه ته به يوه پنځوس کيلويي بورۍ لومړۍ درجه اوړه او پنځه لېټره غوړي ورکړل شي.»
له دې سره بلخ کې د معارف رياست مسوولين يو ځل بيا ژمنه کوي،چې ډېر ژر به د ښوونکو تنخواوې ورکړل شي.
د بلخ پوهنې رياست د ښاري معارف مسوول محمد نعيم بلخي وايي:« موږ بار بار د دې همغږي کړې،چې د ښوونکو حقوق او تنخواوې ورکړل شي. انشاءلله چې د دوه مياشتو استحقاقونه مرکز ته غوښتل شوي او ژر به يې تنخواوې اجراء شي.»
د بلخ ديني عالمان هم د هېواد پر سوداګرو او تجارتي شرکتونو غږ کوي،چې په اوسنيو ناوړه اقتصادي شرايطو کې دې د ټولنې له بېوزله کورنيو سره مرستې وکړي.
خبریال: جاوید واک
